Қазақстан Республикасының Президенті Қасым-Жомарт Тоқаев биылғы Жолдауында еліміздің әлеуметтік-экономикалық дамуын жеделдетуге, цифрландыру мен ауылшаруашылығының жаңа кезеңге өтуіне бағытталған маңызды ұсыныстар мен нақты тапсырмалар жүктеді. Бұл Жолдау – еліміздің алдағы стратегиялық қадамдарын айқындайтын маңызды құжат, сонымен бірге қоғамның барлық саласын қамтитын жан-жақты жоспар. Мемлекет басшысы өндірісті дамыту, цифрлық өзгерістерге ілесу, инвестиция тарту, ауыл өмірін жақсарту мен ғылымды аграрлық салаға енгізу бағытында өзекті мәселелерді қозғап, оларды шешудің нақты жолдарын көрсетті. Ауыл – елдің алтын тамыры Президент Жолдауында ауылшаруашылығы саласына айрықша назар аударылды. Бұл – бекер емес. Себебі Қазақстан халқының тұрмыс-тіршілігі мен болмысында ауыл – басты тірек. Ауылдың дамуы – елдің дамуы. Сондықтан агросекторға жаңа серпін беру – уақыт талабы. «Біз ауылшаруашылығы саласының әлеуетін әлі толық пайдалана алмай отырмыз», – деген Мемлекет басшысының пікірі – шындық. Ауылшаруашылығы тек азық-түлік қауіпсіздігінің кепілі ғана емес, жұмыс орындары, әлеуметтік тұрақтылық және өңірлік даму мәселелерінің шешімі. Сондықтан бұл салада жаңа технологияларды енгізу, заманауи ғылыми негізге көшу – аса маңызды міндет. Агроғылымсыз алға басу мүмкін емес Президент атап өткендей, аграрлық ғылымды дамытпай ауылшаруашылығы саласы ілгерілемейді. Бұл – әсіресе қазіргі климаттың өзгеруі, су тапшылығы, нарықтағы бәсекенің күшеюі жағдайында ерекше өзекті. Ғылымсыз ауылшаруашылығы тек маусымдық өнім беретін, тұрақсыз сала болып қала береді. Ал заманауи агроғылым – бұл өнімділікті арттыру, жерді тиімді пайдалану, жаңа тұқымдар мен агротехнологияларды енгізу, экспортты кеңейту сияқты нақты нәтижелерге жол ашады.
Су ресурстары – ұлттық қауіпсіздік мәселесі Су мәселесі бүгінде тек ауыл үшін емес, тұтас ел үшін стратегиялық маңызы бар мәселе. Осы орайда Мемлекет басшысы Үкіметке су ресурстарының бірыңғай цифрлық платформасын жасауды тапсырды. Бұл платформада жерүсті және жерасты сулары туралы ақпарат, су қоймалары мен каналдардың жағдайы, цифрлық карта мен талдаулар жасанды интеллект негізінде жүзеге асады. Мұндай жүйе су үнемдеу, әділетті бөлу және қауіпсіздік тұрғысынан маңызды. Бұл – еліміздің су қауіпсіздігін қамтамасыз етудің жаңа кезеңі. Инвестиция тартуда мақсаттылық қажет Президент Жолдауда инвестиция мәселесіне де арнайы тоқталды. Ол қазіргі инвестицияның көп бөлігі шикізат саласына бағытталғанын айтып, ендігі кезекте өңдеу өнеркәсібіне, агросекторға, технология мен ғылымға инвестиция тартуға басымдық берілуі керек екенін айтты. «Инвестиция тартуда нақты қажет салаларды анықтап, тәртіп орнату қажет», – деді Президент. Бұл – ел экономикасын ұзақмерзімді тұрақты өсімге шығаратын шешім. Шикізатты шетке жіберіп, дайын өнімді сырттан тасымалдау – бұл тек тәуелділікті күшейтеді.
Ал өнімді терең өңдеу – экспорттық табыс пен ішкі нарықты қорғаудың негізі. Цифрлық даму – уақыт талабы Президент Жолдауында цифрландыру мәселесі әр салада терең қозғалды. Бұл – ауылдан бастап, өндіріс, білім беру, денсаулық сақтау, су ресурстары мен басқару жүйесіне дейінгі барлық салаға қатысты. «Қазір – жаппай цифрландыру және жасанды интеллект дәуірі», – деді Мемлекет басшысы. Цифрландыру – елдің тиімділігін арттырудың, сыбайлас жемқорлықты азайтудың және халыққа көрсетілетін қызметтердің сапасын жақсартудың бірден-бір жолы. Қорытынды: Болашақ – нақты іспен байланысты Биылғы Жолдау – елдің болашағына сенімділік пен жаңа серпін беретін құжат. Мұнда айтылған мәселелер – бүгінгі қоғамның шынайы сұранысына жауап береді. Біздің алдымызда тұрған міндет – Президент ұсынған бағыттарды іске асыруда өз үлесімізді қосу. Әсіресе ауылшаруашылығын дамыту, ғылым мен цифрлық мүмкіндіктерді тиімді пайдалану, ұлт бірлігін сақтай отырып, нақты еңбекпен жетістікке жету – әрқайсымыздың ортақ жауапкершілігіміз. Қазақтың жаны – ауылда. Ендеше, ауылды жаңғыртпай, ел дамымайды. Президент Жолдауы – осы ұстанымның дәлелі. Кенжехан ТӨЛЕБАЕВ Шымкент қалалық ардагерлер кеңесінің төрағасы
