Шымкент қаласында ҚР Конституциясының 30 жылдығына арналған «Мерейлі 30 күн» іс-шаралар легі аясында құқықтық сипаттағы маңызды акциялардың бірі өтті. Қалалық «Достық» үйінде ұйымдастырылған «Әр азаматқа – заңдық көмек!» атты акцияның мақсаты – тұрғындарға құқықтық қолдау көрсету, олардың заң алдындағы сауаттылығын арттыру, сондай-ақ әділет органдарының қызметімен таныстыру болды.
Іс-шараны Шымкент қаласы Әділет департаменті ұйымдастырды. Акция барысында қала тұрғындарына кәсіби заңгерлер, нотариустар, адвокаттар мен медиаторлар тегін құқықтық кеңес берді. Сонымен қатар, басқарма өкілдері мен тәжірибелі мамандар азаматтарды толғандырып жүрген түрлі мәселелер бойынша түсіндіру жұмыстарын жүргізді.
Кеңес берілген негізгі бағыттар:
-
Отбасылық құқық – ажырасу, алимент өндіріп алу, баланың қамқорлығы сынды мәселелер;
-
Еңбек даулары – жұмыс беруші мен жұмысшы арасындағы келісімдер, еңбек шарттарының бұзылуы;
-
Мүліктік қатынастар – мұрагерлік, тұрғын үйді тіркеу, меншік құқығы мәселелері;
-
Сот орындаушыларымен байланысты сұрақтар – атқарушылық өндіріс, борышкер құқығы мен міндеттері.
Шымкент қаласы Әділет департаментінің басшысы Айнұр Исабекованың айтуынша, соңғы уақытта азаматтар тарапынан сот орындаушыларға қатысты өтініштер жиілеп кеткен. Осыған байланысты әділет органдары халықпен тығыз жұмыс істеп, олардың құқықтық сауаттылығын арттыруды басты назарға алып отыр. Оның айтуынша, қазіргі таңда Әділет министрлігі жаңа цифрлық қызметтерді енгізіп, құқықтық қолжетімділікті жеңілдету бағытында кешенді жұмыстар жүргізуде.
«Бүгінгі акция – халық пен құқық қорғау институттары арасындағы алтын көпір. Азаматтар күнделікті өмірде түрлі құқықтық мәселелерге тап болып жатады. Осы іс-шара арқылы біз халықтың жанайқайын тыңдап, нақты әрі тиімді кеңес беруге тырысамыз. Құқықтық көмек – әр азаматқа керек. Әсіресе, әлеуметтік осал топтарға қолжетімді болуын қамтамасыз ету – басты міндетіміз», – деді Айнұр Исабекова.
Этномедиация өкілдері мен қоғамдық ұйымдар да белсенді қатысты
Акцияға Шымкент қалалық Қазақстан халқы Ассамблеясы жанындағы Этномедиация кеңесінің мүшелері де атсалысты. Олар тұрғындарға құқықтық дауларды бейбіт жолмен шешу, медиативтік келісім арқылы даудың алдын алу тетіктерін түсіндірді. Сонымен қатар, құқық қорғау және қоғамдық ұйым өкілдері халықпен ашық диалог орнатып, нақты мысалдар арқылы заңды білу мен оны дұрыс қолданудың маңыздылығын жеткізді.
Алдағы уақытта жалғасатын шаралар
Мұндай акциялар қала аумағындағы басқа да аудандарда жалғасын таппақ. Әділет департаменті мен өзге де мүдделі ұйымдар бірлесіп, «Ашық есік күндері», көшпелі қабылдаулар, құқықтық кеңес беру сағаттарын тұрақты түрде өткізуді жоспарлап отыр. Бұл – азаматтарға барынша жақын болу және құқықтық қолжетімділікті арттыру жолындағы нақты қадам.
