Жаңа оқу жылының басталуына орай Шымкент қаласында балалардың жолда жүру қауіпсіздігін қамтамасыз етуге бағытталған кешенді профилактикалық шаралар қолға алынды. Бұл туралы Өңірлік коммуникациялар қызметінде өткен баспасөз брифингінде Шымкент қалалық Полиция департаменті Әкімшілік полиция басқармасының бастығы, полиция полковнигі Асқар Жүзжасаров мәлімдеді.
Жол қозғалысы – бақылауда
Полиция департаментінің бастамасымен:
-
Қаланың барлық мектептері мен балабақшалары,
-
Мектепке дейінгі ұйымдар маңындағы жол учаскелері толық зерделенді.
162 мемлекеттік мектептің алдындағы жаяу жүргінші өткелдерінің, жол таңбалары мен жол белгілерінің техникалық жай-күйі жіті тексерілді. Бұл жұмыстардың басты мақсаты – жол-көлік оқиғаларының алдын алып, оқушылардың қауіпсіз қозғалысын қамтамасыз ету.
Тиісті нұсқамалар берілді
Тексеру нәтижесінде Жолаушылар көлігі және автомобиль жолдары басқармасына мынадай негізгі жол белгілерін орнату бойынша нұсқамалар берілді:
-
5.16.1, 5.16.2 – жаяу жүргінші өткелі,
-
1.21 – балалар жүретін аймақ,
-
3.24 – жылдамдықты шектеу,
-
1.16.1 – жасанды жол кедергісі (лежачий полицейский).
Бұл талаптар жаңадан ашылған мектептер маңындағы жол инфрақұрылымына да қатысты қолданылды.
Қалалық қызметтермен бірлескен жұмыс
Қазіргі таңда:
-
Жаяу жүргінші жолақтары жаңартылып,
-
Ағаш бұталары мен шөптер жол белгілерін көлегейлемеу үшін кесіліп жатыр.
Бұл жұмыстарды Жолаушылар көлігі және автомобиль жолдары басқармасы мен Жайлы ортаны дамыту басқармасы күнделікті режимде атқаруда.
Мамандардың айтуынша, жол қозғалыс қауіпсіздігін күшейту шаралары жаңа оқу жылы бойы жалғасатын болады.
Ата-аналар мен мұғалімдердің рөлі маңызды
Брифинг барысында полиция өкілі:
– Балалар үшін қауіпсіз орта қалыптастыру – тек мемлекеттік органдардың емес, ата-аналар мен мұғалімдердің де ортақ жауапкершілігі. Жол қозғалысы ережелерін күнделікті тұрмыста үйрету, үлгі көрсету – аса маңызды, – деп атап өтті.
Жол қауіпсіздігі – балалардың амандығы үшін
Шымкент қаласы әкімдігі мен Полиция департаменті жол-көлік инфрақұрылымын кезең-кезеңімен жетілдіруді,
қауіпсіздік талаптарын тұрақты түрде бақылауда ұстауды және
оқушылардың қауіпсіз жүріп-тұруын қамтамасыз етуді мақсат етіп отыр.
Бұл шаралар – балалардың мектепке қауіпсіз жетіп, үйлеріне аман-есен оралуын қамтамасыз ететін маңызды бастама. Жолдағы тәртіп – баршамызға ортақ талап екенін ұмытпаған жөн.
