Түркістан облысы аумағында жол қауіпсіздігін қамтамасыз ету және құқықбұзушылықтың алдын алу мақсатында “Бір нүктелік” және “Қауіпсіз жол” жедел-профилактикалық іс-шарасы қарқынды түрде жүзеге асырылуда. Іс-шараға Түркістан облысы Полиция департаментінің Патрульдік полиция батальонының қызметкерлері белсенді түрде қатысып, аймақ тұрғындары арасында түсіндіру жұмыстарын жүргізуде.
Полиция қызметкерлері жол қозғалысына қатысушыларға жол ережелерін сақтаудың маңыздылығын жеткізіп, жүргізушілер мен жаяу жүргіншілерге қауіпсіздік талаптарын қатаң сақтау қажеттігін түсіндіруде. Әсіресе, жылдамдықты шектен тыс асырмау, мас күйде көлік жүргізбеу, жаяу жүргіншілерге жол беру, көлік құралдарының техникалық жай-күйіне мән беру сынды ережелер ескертілуде. Іс-шара барысында тұрғындарға ақпараттық брошюралар таратылып, арнайы әзірленген ескерту бейнероликтері көрсетілді.
Аталған шараның басты мақсаты – тұрғындардың қауіпсіздігін қамтамасыз етіп, жол-көлік оқиғалары мен құқықбұзушылықтардың алдын алу. Бұл тек жол үстіндегі қауіпсіздікпен шектелмейді. Патрульдік полиция қызметкерлері қоғамдық тәртіпті сақтау, ұрлық, бұзақылық, вандализм секілді құқыққа қарсы әрекеттердің алдын алу бағытында да тынымсыз жұмыс атқаруда.
Сонымен қатар, полиция тарапынан мектеп оқушылары мен жасөспірімдер арасында да түсіндіру жұмыстары жүргізіліп жатыр. Білім беру мекемелерінде жолда жүру ережелеріне арналған сабақтар, семинарлар ұйымдастырылып, балаларға қауіпсіз жүріс-тұрыс мәдениетін қалыптастыруға назар аударылуда. Бұл – болашақта жол-көлік оқиғаларының санын азайтуға бағытталған ұзақ мерзімді шаралардың бірі.
Тәртіп сақшыларының күнделікті қызметі – азаматтардың бейбіт өмірі мен қоғамдық тұрақтылықтың кепілі. Олар тәуліктің кез келген уақытында, ауа райына қарамастан, ел тыныштығы үшін қызмет атқарып келеді. Жол бойындағы қызметінен бөлек, түрлі қоғамдық іс-шараларда, мерекелік жиындар мен жаппай жиналатын орындарда тәртіпті қамтамасыз етіп, төтенше жағдайларға дереу әрекет ету қабілетімен ерекшеленеді.
Жалпы, полиция мен қоғам арасындағы тығыз байланыс – қауіпсіздік пен тұрақтылықтың негізі. “Бір нүктелік” және “Қауіпсіз жол” шарасы аясында атқарылып жатқан жұмыстар осы бағыттағы серпінді қадамдардың бірі. Алдағы уақытта мұндай іс-шаралар жиі өткізіліп, құқықтық сауаттылық деңгейін арттыруға және жол-көлік апаттарын мейлінше азайтуға ықпал ететін болады.
