Шымкент қаласының №131 орта мектебінде «Отанды қорғау – қасиетті борыш» құндылығын дәріптеуге және жастардың әскери қызметке деген қызығушылығын арттыруға бағытталған бір күндік әдістемелік семинар өтті. Іс-шараға Еңбекші және Қаратау аудандарының алғашқы әскери және технологиялық дайындық мұғалімдері қатысты.
Семинарды аша отырып, қаланың қорғаныс істері жөніндегі департаменті бастығының орынбасары полковник Әжімұхан Шынтаев өскелең ұрпақтың бойында өз елі үшін патриоттық және жауапкершілік сезімін қалыптастыруда осындай бастамалардың маңыздылығын атап өтті.
— Мұндай іс-шаралар оқытушылар арасында тәжірибе алмасуға ғана емес, сонымен қатар болашақ Отан қорғаушыларды тәрбиелеуге берік негіз қалайды, — деп атап өтті ол.
Семинар барысында қатысушылар әскери дайындыққа байланысты пәндерді оқытудың өзекті әдістемелерін талқылады, сондай-ақ жалпы әскери қорғаныс костюмін қолдану, табиғи жағдайда автономды өмір сүру негіздері және ядролық қару мен оның сипаттамалары сияқты тақырыптар бойынша практикалық дағдыларды пысықтады.
Сонымен қатар, полиция департаментінің қызметкерлері жол қозғалысы ережелері мен қауіпсіздік шаралары бойынша түсіндіру жұмыстарын жүргізді. Олар оқытушыларға оқушылардың жолдарда қауіпсіз жүріс-тұрыс мәдениетін қалыптастырудың маңыздылығын еске салды.
Тұрақты семинарлар педагогтардың кәсіби деңгейін арттыруға ықпал етеді және жастарды патриотизм мен азаматтық жауапкершілік рухында тәрбиелеуге көмектеседі.
Шымкент гарнизонының баспасөз қызметі
