Шохзод Эргештаев, Қожа Ахмет Ясауи атындағы Халықаралық қазақ-түрік университетіндегі Жастар саясаты департаментіне қарасты жастар орталығының жетекші маманы, университеттегі студенттік клубтар мен олардың қызметі жайлы толығырақ айтып берді.
Шаңырақ студенттік ұйымдар бірлестігі
–Университетте қанша студенттік клуб бар?
– Қожа Ахмет Ясауи атындағы халықаралық қазақ–түрік университетінде “Шаңырақ” студенттік клубтар бірлестігіне қарасты 20 студенттік ұйым жұмыс істейді. Бұл клубтарды бағыттарына қарай бірнеше топқа бөлуге болады: саяси-дипломатиялық, тарихи-танымдық, экологиялық, әлеуметтік жұмыстар және басқа салаларда белсенділік танытады.
Белсенді клубтардың ерекшеліктері
–Белсенді екі клуб жайлы кеңінен тоқталып өтесізбе?
– Университетіміздегі барлық клубтарды белсенді деп айтуға болады. Соның ішінде ерекше көзге түсетін – “Халықаралық студенттер клубтары” мен “Қазақстан студенттер альянсы”.Сонымен қатар “Y—peer” халықаралық желісі Біріккен Ұлттар Ұйымының құрамындағы клуб ретінде қазіргі қоғамдағы өзекті мәселелерді көтеріп, оқу орда студенттерінің және қала жастарының арасында семинарлар ұйымдастыруда.
“Қазақстан студенттер альянсы” клубы студенттердің құқықтарын қорғау, түрлі салада қолдау көрсету, жастардың идеяларын жоғары деңгейде жеткізу секілді маңызды мәселелермен айналысады.
Қаржыландыру және қолдау
–Студенттік клубтарға қаржы бөлінедіме?
– Студенттік клубтар университет тарапынан нақты қаржылай қолдау алмайды. Бірақ олардың іс-шараларына университет жан-жақты көмек көрсетеді. Бұл материалдық құралдар немесе ұйымдастыру мәселелеріндегі көмек болуы мүмкін.
Маманданған және еріктілер клубтары
–Ұйымдарда кімдер жұмыс атқарады?
Универ ішіндегі студенттерме?Сырттан арнайы маман келедіме?
– Кейбір клубтар нақты мамандардың қатысуымен жұмыс істесе, басқаларында тек студенттер белсенділік танытады. Мысалы, медицина және стоматология саласына арналған клубтарда облыстық координаторлар басшылық етсе, жалпы ұйымдастырушылық жұмыстарға университет белсенділері атсалысады.
Сонымен қатар, еріктілер клубы да ерекше орын алады. Түркістан өңірінде төтенше жағдайлар немесе қоғамдық іс-шаралар ұйымдастырылған кезде еріктілер клубының мүшелері белсенді жұмыс істейді. Мысалы, жуырда жүгіруден өткен марафонда студенттер өз еріктерімен қатысушыларға қолдау көрсеткен болатын.
Оқу орда студенттеріне арналған іс-шаралар
–Клубтар ұйымдастырған ірі деңгейде іс шаралар өткізіледіме?
– Университетте жыл сайын “Club Fair” атты клубтар көрмесі өтеді. Бұл шара студенттік клубтар туралы мәлімет беріп, жаңадан келген жастардың бос уақытын тиімді пайдалануға мүмкіндік береді.
Халықаралық университет болғандықтан, шетелдік студенттерге арналған “Түркі әлемі жастар клубы” ерекше рөл атқарады. Жыл сайын бұл клубтың ұйымдастыруымен “Достық фестивалі” өтеді. Сонымен қатар, университетте “Ясауи” дебат клубы республикалық деңгейде екі-үш рет турнир өткізеді, оның біреуі мектеп оқушыларына арналған, және жеңімпаздарға университет гранттары беріледі.
Университеттің студенттік клубтары – жастардың жан-жақты дамуына, әлеуметтік жауапкершілікті арттыруға және бос уақытты тиімді өткізуге тамаша мүмкіндік. Олар тек университет ішінде емес, аймақтық және халықаралық деңгейде де үлкен белсенділік көрсетуде.
Диана Серікқызы
ХҚТУ-дың 4 курс студенті
