Шымкент қаласы бойынша Сыбайлас жемқорлыққа қарсы өңірлік іс-шаралар жоспары жүзеге асырылуда. Нәтижесінде Шымкент қаласында алдыңғы жылмен салыстырғанда сыбайлас жемқорлық әрекеттері 69%-ға азайған.
Бұл жөнінде бүгін ҚР Сыбайлас жемқорлыққа қарсы іс-қимыл агенттігінің 2020 жылдың қорытындысы бойынша кеңейтілген алқа отырысында айтылды.
Шымкент қаласында қоғамдағы сыбайлас жемқорлыққа қарсы мәдениетті қалыптастыру және халықпен тығыз байланысты орнату мақсатында «Шымкент – адалдық Алаңы» кеңсесі, әкімдік ғимаратының бірінші қабатында «Ашық әкімдік» және «фронт–офис» жұмысы ұйымдастырылған.
Азаматтардың қажеттілігіне жедел әрекет ету мақсатында ANTIKOR ORTALYǴY сервистік орталығы ашылды. «ANTIKOR LIVE» жобасы аясында қала әкімі, оның орынбасарлары және аудан әкімдері тұрақты негізде баяндама жасап отырады.
«Open Space» пилоттық жобасы аясында Шымкент қаласының әкімдігі, Шымкент қаласының 4 аудан әкімі аппараты,
5 басқарма, 137 мектеп, 11 емхана және 8 колледж ашық түрде жұмыс жасауға көшті. Ал, Шымкент қаласы әкімдігімен көрсетілетін 165 мемлекеттік қызметтің барлығы 100% электронды түрде жүргізіліп келеді.
Азаматтарды әділеттілік пен парасаттылыққа баулу мақсатында қала аумағындағы көпқабатты тұрғын үйлердің қасбеттеріне «Жемқорлық — қоғам дерті» муралдары салынды.
Сонымен қатар, Шымкент қаласы әкімдігінде тәулік бойы жұмыс істейтін «Айкөмек» бірыңғай байланыс орталығы ашылған. Онда қала тұрғындары 109 нөмірі арқылы кез-келген сұраққа жауап алады. Орталық тәулігіне 3000 қоңырау қабылдауға қауқарлы. Бұл да өз кезегінде тұрғындардың шағымдарына назар аударып, дер кезінде мәселенің шешілуіне ықпал етеді.
Шымкент қаласы әкімдігінің баспасөз қызметі
