Биылғы сайлауға «Nur Otan» партиясы айрықша дайындықпен келді. Өткен жылы алғаш рет праймериз өткізіп, көпшіліктің көкейінде жүрген өзекті мәселелер бойынша бағдарлама түзілді.
Шымкент қаласындағы партияның Сайлауалды бағдарламасы праймериз кезеңінде жұртшылық тарапынан айтылған ұсыныстар негізінде әзірленді. Тұрғындардан түскен 685 ұсыныстың 98 пайызы партияның бағдарламасына енгізілді.
Алдағы уақытта біз сайлауалды бағдарламада белгіленген 10 басымдылық бойынша жұмыс істейміз. Қалаға қосылған елді мекендердің түйінді проблемалары біздің бақылауымызда болады. Биыл ауыз су бойынша проблемалы 11 елді мекеннің (немесе 67 мың тұрғынның) мәселесі шешіледі.
Алдағы 5 жылда қаламызда 72 мектептің құрылысы жүргізіледі. Биыл жаңа 12 мектеп ел игілігіне беріледі.
Саяси құжатта «Бизнестің жол картасы – 2025» бағдарламасы аясында 500 кәсіпкерге қолдау көрсету жоспарланған. Оның 119-ы осы жылы іске асады. Сондай-ақ, 300 шағын бизнес субьектеріне қолдау көрсетудің 78-і «Еңбек» бағдарламасы аясында биыл орындалады.
Бүгінде бағдарламаны жүйелі іске асыру үшін Жол картасы әзірленіп, фракция отырысында қаралды. Біз өз кезегінде жоспарлы жұмыстардың өз мерзімінде әрі сапалы орындалуын бақылайтын боламыз.
«Nur Otan» – партиясы белгілеген межелі міндеттердің орындалуына бар күш жігерін салады.
Біздің мақсатымыз – даму арқылы тұрақтылықты сақтау және халықтың тұрмыс жағдайын жақсартып, ел игілігіне қызмет етуді көздейді.
«Nur Otan» партиясы Шымкент
қалалық филалы төрағасының
бірінші орынбасары
Жанар Бектаева
