Ұялы байланыс операторлары абоненттерінің мекен-жайы туралы ақпаратты беруге келіскен.
Апта соңына дейін Оралда адамдардың жаппай жиналуын болдырмау мақсатында ұялы телефон арқылы бақылау жұмысын жүргізуді қолға алады. Аталған сақтық шарасы бірнеше күннен соң өз күшіне енбек, деп хабарлайды «Мой город» порталы.
Ақпараттық портал мәліметіне сәйкес, жауаптылар Beeline, Kcell, Tele2 және Altel ұялы байланыс операторларымен келіссөздер жүргізіп қойған.
«Біз ешкімді жеке бақылауда ұстамаймыз. Бұл “арнайы карта” болмақ. Операторлар бізге адамдардың көп жиналған орындар туралы ақпарат береді. Картадан біз сол мекен-жайдағы нысандарды — яғни, мейрамхана, бар немесе кафені табамыз. Егер осы мекемелерде кешкі 20:00-ден кейін тұрғындардың көптеп жиналғанын байқасақ, карантин талабын бұзғанын анықтайтын боламыз”,- деп түсіндірді Орал қаласы мониторинг тобының жетекшісі Аслан Жармұханов.
БҚО ақпараттандыру, мемлекеттік қызметтер көрсету және архивтер басқарма басшысының міндетін атқарушы Петр Лежников операторлардан алынған мәліметтер жеке тұлғаға қатысы жоқ дегенді алға тартады. Яғни, бақылаушылар телефон нөмір иелері жайында деректерді көрмейді.
«Дербестендірілмеген аналитикалық ақпараттың дәл осындай түрі коммерциялық ұйымдарға бұрыннан қолжетімді болған. Олар келушілер ағынын, жарнамалық перспективалық орындарды, бөлшек сауда орындары мен перспективасы жоғары жерді осы жолмен анықтап келген», — деп түсіндірді Лежников.
Айта кетейік, жауаптылар көп қабатты үйлерде орналасқан нысандарда бақылау жұмысы қалай жүзеге асырылатындығы әзәрге белгісіз ккендігін де атап өтті.
Ал адам құқықтары жөніндегі халықаралық бюроның директоры Павел Кочетков азаматтардың қозғалысын бақылау — жеке өмірге қол сұғу деп санайды. Сөзінше, мұндай әрекетке сот тек қылмыстық іс бойынша санкция бере алады.
“Конституция бойынша мемлекет әр азаматпен хат алмасу және телефонмен сөйлесу құпиялылығына кепілдік береді. Бұл бақылау шарасы шектен шыққандық. Бұл заңсыз. Операторлардың мұндай ақпаратты жариялауға құқығы жоқ », — дейді Кочетков.
Сондай-ақ, ол “мониторингтік топтарды заңсыз құралғандығын айтып, арнайы органдар ғана ие бола алатын мұндай өкілеттікті мониторингтік топқа кім бергені түсініксіз” — деп мәлімдеді.
