Нигериялық ауылда мысықты емшек сүтімен тамақтандырған иттің видеосы танымалдыққа ие болды. Үй жануарларымен түсірілген видеоны Reuters агенттігі байқаған. Twitter әлеуметтік желісіне жарияланған 32 секундтық жазбада ауыл тұрғындары ит пен мысықты қоршап тұрғанын байқауға болады. Жерде тыныш жатқан итті емірене емген мысықтың бейнеролигі желіде тарап танымалдыққа ие болған. Бұл видео 383,5 мыңнан астам қаралым, 2 мыңға жуық лүпіл мен көптеген ретвит жинады. Желі қонданушыларының бірі “Табиғаттың даналығы, біз адам ретінде кішіпейіл болуды әлі үйренуіміз керек” , — деп пікір білдірді. Енді бірі «Мен осы әдемі және асыл жаратылыстарға жақсы күтім жасайды деп үміттенемін», — деген сияқты ойын жарыса жазған.
Еске салсақ, осыған дейін іздеу-құтқару иті Измир провинциясында болған жер сілкінісі салдарынан қираған үйдің астында қалып қойған мысықтың шығуына көмектескені хабарланған болатын. Үй жануары құлаған ғимараттың екі қабатының астында қыстырылып қалған еді. Көмекке ит келгенше мысық 30 сағаттай қираған нысан астында жатқанын шетелдік тілшілер жарыса жазған еді.
