Түркістан облысында 62 инвестициялық жоба іске асырылады

Өткен жылдың тиісті кезеңімен салыстырғанда 137,8%-ға өсті. Түркістан өңірінде инвестициялар көлемі 420,8 млрд теңгені құрады. Биыл жартыжылдықтың қорытындысымен өңірге тартылған инвестициялар көлемі 420,8 млрд теңгені құрап, өткен жылдың тиісті кезеңімен салыстырғанда 137,8%-ға өсті. Ал, жалпы 2024 жылы құны 151,9 млрд. теңгені құрайтын 2 406 жаңа жұмыс орнымен 62 инвестициялық жобаны іске асыру жоспарлануда. Бұл жайында бүгін Түркістан облыстық кәсіпкерлік және өнеркәсіп басқармасының басшысы Нұржігіт Мырзахметов мәлімдеді. «Өңірге инвестиция тарту жұмыстарын күшейту үшін аудан және қала әкімдіктері, бизнес өкілдерімен бірлесе өткен жылы шет елдерге іс-сапарлар ұйымдастырылды. Нәтижесінде облыс экономикасына шамамен 1,2 трлн теңге инвестиция бағытталатын болды. Ірі жобалардың қатарында тоқыма кластерін құру бойынша «Лихуа Групп» компаниясы бар. Аталған компания облыста құбыр және тамшылатып суару жүйелерін өндіретін зауыт, 2 мақта өңдеу зауытын, жіп иіру, бояу және әрлеу фабрикасын, тігін фабрикасы сияқты инвестициялық жобаларды іске қосуды жоспарлауда. Биыл Қытай, Түркия және Корея елдеріне іс-сапарлар ұйымдастырылды. Сапар аясында облыстық делегация маңызды жобаларды жүзеге асыру, ІТ саласында тәжірибе алмасу, ауыл шаруашылығы саласын дамыту, озық технологиямен қамту, терең өңдеу, білім, мәдениет, туризм, Түркістан қаласындағы әуежайдың логистикалық әлеуетін пайдалану, әуе рейсін ашу және өзге де мәселелерде әріптестік орнату бойынша келіссөздер жүргізді», — деді басқарма басшысы. Бұдан бөлек, облыстың өнеркәсіп саласында биыл өнім көлемін 1 трлн 120 млрд теңгеге және өңдеу өнеркәсібі өнімі көлемін 510 млрд. теңгеге жеткізу жоспарланып отыр. 2024 жылдың 6 айдың қорытындысымен салада 551,6 млрд. теңгеге өнім өндіріліп, өткен жылдың тиісті кезеңімен салыстырғанда 106,8%-ға өскен. Қазіргі уақытта облыста 1 003,2 гектарды құрайтын 13 индустриалды аймақ және 580 гектар аумақта арнайы экономикалық аймақтар бар. Бұл аумақтарда 53 кәсіпорын жұмыс істейді. Биыл қосымша 30 жобаның құрылыс жұмыстары жүргізіліп жатыр.