Шымкентте жауған қардың салдарынан коммуналдық қызметтің жағдайы белгілі болды. Қаладағы бірнеше шағын аудандарда жарық пен жылу сөніп, қақаған аязда халық әбіржіп қалды. Тұрғындардың мәселесін көтеріп, қала әкімінің жұмысын сынға алған белгілі журналист Мөлдір Бекеева әлеуметтік желіде шахар басшысына базынасын жеткізді.
«Айтсаң — айтты дейді, айтылмаса — сөздің атасы өледі», — деуші еді ғой қазекең. Қайтеміз енді? Айтамыз! Бүгін Шымкентте қар жауған (түн ауа басталды), Елордадағыдай бұрқасын деп ойлап қалмаңыздар тағы) Жәй кәнігі тобыққа жетер-жетпес шамадағы қар ғой. Жыл он екі ай күн күлімдеп тұратын қалада бұл әжептеурім «жаңалық» болғанын да жасырмаймыз. Әсіресе, қала билігі — қала әкімдігі үшін! Әдетте фейсбук пен өзге де әлеуметтік желілерде «#әкіміміз_әйтенов немесе #мега, мегаполиспіз» деген хэштегпен атойлатып жазба қалдырушы «жағымпаздардың» да бүгін үні өшкен! Себебі, қалаға қар түскені сол — әлгі мегаполисіміздегі бір емес, бірнеше шағынаудандарда (Асар-2, Азат, Самал-1, Самал-2, Көкбұлақ, Самал-3, Игілік, Қайтпас-1, Ақжайық, Достық, Жаңаталап,Ынтымақ, Забадам, Азат, Тельман, Солтүстік Батыс) жарық, жылу жүйелері істен шықты. Иә, тұрғындар қаңтардың қара суығында жарықсыз және жылусыз қалды. Шақалақтары барлар да жандарын қоярға жер таппай, қазір жан-жақтан жан ұшыра хабарласып жатыр. Қайтсін енді? Көмекті биліктен емес, әдеттегідей сол журналистерден іздейді ғой. Ааа…айтпақшы, «Асар-2» шағынауданында өткен жылы (тұрғындар әлі жыл толған жоқ дейді) су жаңа бағаналар (столбалар) қойылған екен. Эххх, өкініштісі сол — әлгі «сұмдық» сапалы делінген бағана қазір құлап жатқанға ұқсайды… Неткен сапа бұл деймінде) Неткен сапа??? Қайдан және қанша қаржыға алынып, қойылды екен деген сауал туындайды ғой көкейде… Әйтеновтың қаржыны игерудегі іскерлігіне шүбәміз жоқ екенін бір жетіден бері желі белсенділері айтып та, жазып та жатыр. Бірақ, арасында «жесткий торг» (аукцион) мәселесінен бөлек, қараша халықтың коммуналдық мәселелеріне де көңіл бөлуіне болады ғой?! #Әйтенов кет емес, кел… Мәселені көр деп жатырмыз! Нәтиже бар ма? Халық күтуден шаршады! Сіз және командаңыздың құдалықтың думанды дастарханын жасап, алдын ала тойлауға уақыты бар да, бірақ халықтың мәселесін қарауда дым уақыты жоқ екеніне бүгін тағы да куәгер болып отырмыз… Көрнекті тұлға Асанбай Асқаровтың көзіндей болған нысанға көз тігіп, шүйліге бергенше еңңң алдымен… халықтың қамын қарық қылып алшы, Әйтенов!…деуден басқа тағы да амалымыз қалмады! Сау бол! Бізге «саудагер» емес, іскер әкім керек!
Әлеуметтік желіде Мөлдір Бекееваның пікірін қолдаушылар саны аз болмады. Желі қолданушыларының бірі «Көңілім толмайды Әйтеновке,Ғабидолла дұрыс әкім еді» деп, ағынан жарылса, енді бірі «ол розовый очкиді шешпей, қаланың проблемасын көрмейді» деп, журналистің жазбасын қуаттай түсті.
Айта кетейік, Шымкент қаласының әкімі Мұрат Әйтенов өткен жылы қараша айында коммуналдық қызметтің дайындығын пысықтап, қысқа сақадай саймыз деп мәлімдеген болатын.
Фото мен пікірлер Фейсбук әлеуметтік желісіне алынды.
