5-ШІ ДҮНИЕЖҮЗІЛІК КӨШПЕНДІЛЕР ОЙЫНДАРЫ: Шымкентте сайыс ұйымдастырылды

Аталған сайыста 20 отбасы бақ сынады. Шымкентте 5-ші Дүниежүзілік көшпенділер ойындары аясында ерекше шара өтті. Бұл жолы қаланың спорт мектептерінің қызметкерлері мен олардың жанұялары жеңіл атлетикалық манежде бас қосып, отбасылық эстафета сайысына қатысты. Жарысқа барлығы 20 отбасы қатысты, және бұл сайыс бұрынғыдан ерекше болды. Бұл шараның мақсаты — көшпенділердің рухы мен отбасылық құндылықтарды дәріптеу. Бокстан халықаралық дәрежедегі спорт шебері, қалалық №1 спорт мектебі директорының орынбасары Қанат Орақбаев жарысты салтанатты түрде ашып, қатысушыларға сәттілік тіледі. Жарыс 5 кезеңнен тұрып, отбасылық эстафета, ұзындыққа секіру және басқа да спорттық бағдарламалармен қызықты өтті. Ең үздік нәтижелер көрсеткен отбасылар бағалы сыйлықтар, медальдар және кубоктармен марапатталды. Сонымен қатар, қалада осы мерекелік шара аясында тоғызқұмалақ, теңге ілу, арқан тарту сияқты ұлттық спорт түрлері де насихатталды. Отбасылық эстафета тек спорттық жарыс қана емес, бұл күннің басты мақсаты – салауатты өмір салтын ұстану, ұлттық мұра мен дәстүрлерді дәріптеу. Алдағы уақытта да мұндай шаралар өз жалғасын табады және әрбір отбасы мен қала тұрғынына шабыт беретін жарқын сәттер сыйлайтын болады. Еске салсақ, Дүниежүзілік көшпенділер ойындары – этникалық спорт түрлерінен өткізілетін халықаралық спорт жарыстары. Жарыстар орталық азияның тарихи көшпелі халықтарының ұлттық ойындарына негізделген. Дүниежүзілік көшпенділер ойындары адамзат өркениетінің мұрасы ретінде этноспорттық және этномәдени қозғалысты дамытуға бағытталған. ЮНЕСКО-ның материалдық емес мәдени мұралар тізіміне кіреді. 8-13 қыркүйекте Астана қаласында 5-ші Дүниежүзілік көшпенділер ойындары өтеді. Іс-шараға 89 елден 2000-нан астам спортшы қатысады деп жоспарланған. Астанада өтетін Дүниежүзілік көшпенділер ойындарында барлығы 21 спорт түрінен 97 медаль жиынтығы сарапқа салынады.