Елімізге танымал журналист, қазақтың «Ақжүнісі» атанған Сәуле Әбединова Шымкенттегі атшабардың орнына тұрғын үй салуға келіс-сөздер жүргізіп отырған қала әкімі Мұрат Әйтеновтың іс-әрекетін сынға алды. Қоғам белсендісі өз наразылығын фейсбуктегі жеке парақшасында жариялады.
-Қазақтың жері тар ғой, ипподромның жеріне үй салмағанда қайтсін енді?.. Су үстіне үй, үй үстіне күріш салатын Жапония сияқты алақандай жеріміз бар, қайтеміз енді?.. Халқымыздың саны миллиондап өсіп жатыр, тар жерге сыймай жатырмыз…. ипподром бізге не керек? Одан да үй салатын жер керек!..🙄
«Бояушы-бояушы дегенге, сақалын бояйды» деген осы. «ойбай, BI керемет, Рахимбеков мықты» дегенге семіріп, «сақалын» бояп кетті ме?..
Барды жоқ қылу, қирату, бүлдіру оңай. Жоқтан бар жасау қиын. Одан да бар ипподромды дұрыстап жолға қойып, жұмыс жүргізсе, Әйтенов тарихта қалар еді ғой…
Былтыр «ат спортын дамытайық» деген үндеу тастап едік, нәтижесі — ипподромды қолға алып, жолға қою емес, жою болды.
Әй, Әйтенов, оңбайсың ғой…
Сендерге сөз өтпейді екен. Сөзге қарсы быттиған бронежилет беттерің оққа қарсы бронежилеттен қалың боп тұр ғой! – деп ашынды Сәуле Әбілдаханқызы.
Халықтың пікірімен санаспайтын шенеуніктердің іс-әрекетіне қынжылыс білдірген журналист Шымкент қаласы әкімінің бірінші орынбасарынан бұл мәселені назарға алуды сұрады.
-Shyńǵys Muqan , анау әкіміңізге айтсаңыз болмай ма, — «басеке, қазақтың жері кең ғой, үй салатын жер басқа жақтан да табылады, ал бар ипподромды жоқ қылсақ, болашақта ипподром салуымыз екіталай… одан да ипподромды дұрыс пайдаланып, бекзада спорт түрін дамытайық та, қазақ баласын халықаралық ат спортына бәйгеге қосайық!..» деп , – деді қоғам белсендісі.
Жазба соңында журналист халықтың пікірімен санаспай қабылданған шешім, халықтың наразылығын тудыруы мүмкін екендігін Шымкенттік шенеуніктерге ескертті.
-Бүйтіп бастық болғандарыңды, бүйтіп әкім болғандарыңды сендердің…
Құлқындарыңды ақша тескен… Әйтпесе Шымкент Рахимбековтің құрылыс компаниясының инвестициясына қарап қалыпты ма? «Үй салам десең — әне жерге сал, салмасаң, қоя ғой» деуге шамаларың жетпесе, несіне билік тізгінін ұстап отырсыңдар???
Негізі, бүгінгі биліктің әрбір ісі халықты ашындырып бітті. Соны өздерің сезесіңдер ме???
Мұндай «белден басудың» арты жақсы болмайды. Ежелгі тарихтан солай… өз көрлеріңді өздерің қазыңдар, дұрыс!-деп пікірін сабақтады Сәуле Әбілдаханқызы.
