Түркістан облысының санитариялық-эпидемиологиялық бақылау департаментінің басшысы Нұрбек Нышановтың төрағалығымен мақсатты топ балаларын профилактикалық екпелермен қамту шаралары бойынша жиын өтті. Жиынға департамент басшысының орынбасарлары, бөлім басшылары және аумақтық басқарма басшылары Zoom платформасы арқылы онлайн режимде қатысты.
Лездемелік жиынның күн тәртібінде қаралған мәселе бойынша департамент басшысының орынбасары Бахтыораз Елемесов пен инфекциялық және паразиттік эпидемиологиялық бақылау бөлімінің басшысы Оралбек Жиенәлиев баяндама жасады.
Баяндамашылар 2024 жылдың 6 айында 16 жасқа дейінгі балаларды профилактикалық егулермен қамтудың салыстырмалы деректерін талдады. Сонымен қатар аумақтық басқармалар тарапынан орын алған кемшіліктерді ретке келтіру бойынша қажетті ұсынымдарын білдірді.
Жалпы Түркістан облысы бойынша «Біріңғай халық тіркелімі» ақпараттық жүйесі бойынша 196 344 бала вакцинациялауға жатады. Бүгінгі таңда вакцинациямен қамтылған балалар 47,3 пайызды құрап отыр. Бұл ретте көрсеткішті артқа тартып тұрған Қазығұрт, Созақ аудандары және Түркістан қаласы болып тұр. Сонымен қатар туберкулезге қарсы вакцинамен қамту бойынша Бәйдібек ауданының көрсеткіші көңіл көншітпесе, гексавакцинамен яғни көкжөтелге, дифтерияға, сіреспеге, гемофильді инфекцияға, полиомиелитке және ВГВ-ға қарсы вакциналау бойынша Созақ ауданы мен Түркістан қаласы төмен көрсеткіш көрсетіп тұр.
Жиын барысында бақылау және қадағалау субъектісіне (объектісіне) бармай профилактикалық бақылау жүргізу туралы алгоритмі түсіндірілді. Өз кезегінде департамент басшысы Нұрбек Садықбекұлы көрсеткіштерді біріңғайландыру, ақпараттық жүйлермен жұмыс жүргізуге, профилактикалық екпемен қамту жұмыстарын жандандыру және жалпы салалар бойынша жоспарлы жұмыстарды ширатуға тапсырма берді.
