ҚР Премьер-Министрінің бірінші орынбасары Роман Скляр Қазақстанда 1993 жылдан бері қызмет көрсететін Alarko ірі түрік холдингінің басшылығымен кездесу өткізді.
Консорциум құрамында холдинг Үлкен Алматы айналма автомобиль жолын (ҮАААЖ) салу бойынша ауқымды инфрақұрылымдық жобаны іске асырды.
Сонымен қатар бүгінгі таңда Alarko Шымкентте 500 га астам аумақта ірі жылыжай кешенінің құрылысына $650 млн астам инвестиция салуда. Биыл құрылыс жұмыстарын аяқтап, жобаның I кезеңін пайдалануға беру көзделген.
Холдинг басшылығы жылыжай салу аясында кезең-кезеңімен «әлеуметтік белдеу» құру жоспарланып отырғанын атап өтті. Бұған қоса халықаралық стандарттар бойынша агромамандарды даярлау үшін мамандандырылған академия салу қарастырылған.
Кездесу қорытындысы бойынша тараптар инвестициялық ынтымақтастықты одан әрі нығайтуға сенім білдірді. Түркия Қазақстанның маңызды стратегиялық әріптесі және негізгі сауда-экономикалық серіктесінің бірі болып табылады.
Түркия 2022 ж. нәтижесі бойынша РФ, ҚХР және Италиядан кейін ҚР-ның 4-ші сауда серіктесі болды (5-ші орындан көтерілді).
2022 ж. тауар айналымының рекордтық көрсеткішіне 6,3 млрд. долл. (экспорт 4,8 млрд. долл. , импорт 1,6 млрд. долл. ) қол жеткізілді.
2023 ж. 11 айы бойынша сауда айналымы 5,54 млрд. долл. (экспорт 3,65 млрд. долл. , импорт 1.89 млрд. долл. ) құрады.
Жалпы сауда айналымы осы мезгілде 6% (5,89 млрд. доллардан), экспорт 18% (4,47 млрд. доллардан) төмендеп, импорт 33% (1,42 млрд. доллардан) ұлғайды.
Қазақстан экспортының басым бөлігі шикізат: шикі мұнай, мыс және мыс катодтары, өңделмеген мырыш, мұнай өнімдері, бидай, табиғи газ, өңделмеген қорғасын, мақта, көкөністер бұршақ дақылдары, өңделмеген алюминий.
Импорттың басым бөлігі текстиль: әйелдер тоқыма киімі, күнбағыс тұқымдары, бөлшек сауда үшін өлшеп оралған дәрілік заттар, жейделер, тоқылған фуфайкалар, төсек-орын, асхана, дәретхана және ас үй, автокөліктерге арналған корпустар, әйелдер тоқыма блузкалары, жеңіл автокөлік.
