Мемлекеттік қызмет істері агенттігінің төрағасы Дархан Жазықбай Корея Республикасының Персоналды басқару министрі Ким Сын Хомен кездесті.
Басқосуда тараптар мемлекеттік қызметтегі персоналды басқару бойынша қол қойылған өзара түсіністік және ынтымақтастық туралы Меморандумдағы шараларды іске асыру барысын талқылады.
«Дархан Жазықбай Мемлекет басшысының мемлекеттік қызметті түбегейлі жаңғырту бойынша алға қойған міндеттеріне сәйкес агенттікпен атқарылып жатқан шаралар және осы бағытта цифрлық технологияларды қолдану жұмысымен таныстырды. Агенттік төрағасы мемлекеттік қызметте адам ресурстарын жетілдіру, HR құралдарды енгізу, «e-Qyzmet» жүйесі негізінде іріктеу және персоналды басқаруды цифрландыру бойынша жобалар мен бастамаларға да тоқталды», — деп атап өтті агенттіктен.
Ким Сын Хо мемлекеттік қызмет саласын заман талабына сай үнемі жетілдіріп отыру маңыздылығына тоқталып, өз елінің мемлекеттік қызмет саласындағы тәжірибесімен бөлісті.
Сондай-ақ тараптар мемлекеттік қызметшілердің адам ресурстарын басқару саласындағы біліктілігін арттыру мақсатында олар үшін қысқа мерзімді тағылымдамалар мен ұзақ мерзімді оқытуды ұйымдастыру мүмкіндігін талқылады.
МҚІА төрағасы Корея Республикасының мемлекеттік қызметтегі адами ресурстарды басқарудағы жасанды интеллект технологияларын қолдану және автоматтандыру, сондай-ақ мемлекеттік көрсетілетін қызметтердің сапасын бағалау тәжірибесіне қызығушылық білдірді.
Кездесу соңында тараптар алда мемлекеттік қызмет саласындағы тәжірибе және білім алмасуда ынтымақтастықты одан әрі дамытуға дайын екендіктерін білдірді.
Сонымен қатар, ҚР Мемлекеттік қызмет істері агенттігінің төрағасы Дархан Жазықбай АҚШ-тың Миннеаполис қаласында өткен Американдық мемлекеттік басқару қоғамының (ASPA) жыл сайынғы конференциясына қатысты.
Конференция аясында Астана мемлекеттік қызмет хабымен ұйымдастырылған мемлекеттік қызметтегі адам ресурстарды басқару саласындағы цифрлық трансформация тақырыбындағы панельдік сессияға Қазақстан, Қырғызстан, Әзірбайжан, Корея Республикасы, Түркия елдерінің мемлекеттік қызмет жөніндегі уәкілетті органдарының басшылары қатысты. Панельдік сессия барысында Дархан Жазықбай Қазақстанда мемлекеттік қызметтің гибридті моделін қалыптастыру бағытында цифрлық технологияларды енгізу бойынша қабылданып жатқан шаралар туралы айтты. МҚІА төрағасы кадрлық бизнес-процестерді толық автоматтандыруды және мемлекеттік қызметке іріктеу рәсімдерін цифрландыруды көздейтін «e-Qyzmet» жүйесін дамыту жұмыстарына тоқталып, алдағы уақытта жасанды интеллект құралдарын қолдану мәселесі зерделеніп жатқандығына назар аударды. Вашингтон қаласында жалғасқан жұмыс сапары барысында АҚШ-тың Кадрлық қызмет Офисінің басшылығымен екіжақты кездесу нәтижесінде тараптар мемлекеттік қызметтегі персоналды басқару бойынша жөніндегі өзара түсіністік туралы Меморандумға қол қойды. Меморандум мемлекеттік қызметтегі адами ресурстарды басқару бойынша озық тәжірибе мен ақпарат алмасу, инновацияларды енгізу, мемлекеттік қызметшілердің білімі мен дағдыларын дамыту, жаңа технологияларды пайдалануға бағытталған және басқа да бірлескен іс-шараларды өткізу мүмкіндігін көздейді.
