Қазақстан мен Латвия экономикалық серіктестікті тереңдету үшін күш біріктіруде

Қазақстан Республикасы Сыртқы істер министрінің орынбасары Роман Василенко мен Латвия Республикасының Әл-ауқат министрі Улдис Аугулистің төрағалығымен Қазақстан-Латвия Экономикалық, ғылыми және техникалық ынтымақтастық жөніндегі Үкіметаралық комиссияның 9-шы отырысы өтті.
Үкіметаралық комиссияның жұмысына екі елдің салалық министрліктері мен ведомстволарының өкілдері қатысты. Отырыстың күн тәртібі өзара сауданы кеңейту, бірлескен инвестициялық жобаларды, оның ішінде көлік және логистика, агроөнеркәсіптік кешен, цифровизация, білім беру және туризм салаларындағы жобаларды іске асыру мәселелерін қамтыды. Тараптар Қазақстан мен Латвия арасындағы екіжақты тауар айналымының жоғары өсімін қанағаттанушылықпен атап өтті. Оның көлемі 2023 жылы 356,4 млн АҚШ долларға жетті (63%-ға өсті). 2023 жылдың бірінші тоқсанында екі ел арасындағы тауар айналымы өткен жылдың сәйкес кезеңімен салыстырғанда 27%-ға ұлғайып – 98,5 млн АҚШ долларды құрады.
Санкциялық саясаттың Қазақстан экономикасына әсері және осы мәселе бойынша шетелдік серіктестермен өзара іс-қимыл мәселелеріне ерекше назар аударылды.
Отырыс шеңберінде Р. Василенко іс-шараға келген қонақтарды Қазақстанның әлеуметтік-экономикалық дамуының қорытындыларымен және шетелдік инвесторлар үшін жасалған преференциялармен таныстырып, латвиялық компанияларды қазақстандық нарықтағы инвестициялық жобаларға қатысуға шақырды.
Тараптар екіжақты іскерлік кооперацияны ілгерілету жолындағы Үкіметаралық комиссияның маңызды рөлін және шарттық-құқықтық базаны жетілдіру жөніндегі бірлескен жұмысты жалғастырудың маңыздылығын атап өтті. Кездесу соңында комиссия отырысының қорытынды хаттамасына қол қойылды.
Үкіметаралық комиссия отырысы қарсаңында Р. Василенко ҚР Көлік министрі Марат Қарабаевтың ЛР Көлік министрі Каспарс Бришкенспен өткен кездесуіне қатысты. Келіссөздер барысында сауда-экономикалық саладағы өзара іс-қимылды арттыру мен Қазақстан-Латвия қатынастарын одан әрі кешенді дамытудың өзекті мәселелері талқыланды. Бұл ретте көлік және логистика саласындағы перспективалы бірлескен жобаларды іске асыруға баса назар аударылып, екіжақты іскерлік кооперацияны жандандыру жолындағы қосымша қадамдар нақтыланды.
Іс-сапар шеңберінде, Министрдің орынбасары сондай-ақ ЛР Сыртқы істер министрлігінің Мемлекеттік хатшысы Андрис Пельшспен, Латвия Сейміндегі достық тобының жетекшісі Линда Лиепиня мен оның әріптестері және Латвияның Халықаралық қатынастар институтының (ЛХҚИ) директоры Карлис Буковскиспен келіссөздер жүргізді.
Латвия СІМ-де екіжақты қатынастардың жай-күйі мен перспективалары, сондай-ақ екі елдің халықаралық алаңдардағы өзара іс-қимылы талқыланды. Тараптар Астана мен Риганың саяси диалогты жандандыруға және тереңдетуге, сондай-ақ инвестициялық, гуманитарлық және өзге де салаларда өзара тиімді ынтымақтастықты арттыру бойынша көзқарасын растады.
Латвия Сеймінде өткен кездесуде екіжақты және көпжақты күн тәртібіндегі өзекті мәселелер бойынша жан-жақты пікір алмасу өтті. Р. Василенко латыш тарапына Президент Қасым-Жомарт Тоқаевтың Әділетті Қазақстанды құру бағытын дәйекті түрде іске асыру туралы хабардар етті.
К. Буковскис пен ЛХҚИ қызметкерлерінің қатысуымен өткен кездесуде Қазақстан мен Латвияның ғылыми-зерттеу институттарының желісі бойынша ынтымақтастықты одан әрі кеңейтуге өзара мүдделілік білдірді.
Ригада дәстүрлі сенімді және достық атмосферада өткізілген келіссөздер екі елдің қарым-қатынастарды одан әрі нығайтуға деген көзқарасын растады.
145-ке жуық латвиялық кәсіпорын тіркелген, ал Латвияда 100-ге жуық қазақстандық компания жұмыс істейді. Кәсіпорындар логистика, сауда және қаржылық кеңес беру сияқты салаларда жұмыс істейді.
2005-2023 жылдар аралығында Латвиядан Қазақстанға 276,4 миллион АҚШ доллары көлемінде тікелей инвестицияның жалпы ағыны тартылды.