ШЫМКЕНТ: ДЕНДРОБАҚТА БАУЫРСАҚ ТАРАТЫЛЫП, ҚАРИЯЛАР БАТА БЕРДІ

«Тазалық өзімізден, қоршаған ортаға деген көзқарасымыздан, тұратын, жұмыс істейтін, білім алатын жерден басталады. Ал, оның барлығы өскелең ұрпақтың бойына отбасындағы тәрбиемен келетін қасиет. Асанбай Асқаров атындағы дендробақта бүгін Абай ауданының тұрғындары, жастары жиналып, көктемгі шаруаларға атсалысып жатқаны қуантады. Игі іс әрдайым жалғасын тауып, қаламыз көркейе түссін!». Абай ауданына қарасты Қызылжар шағынауданы бастауыш ардагерлер ұйымының төрағасы Бастархан Байжанов қария жастарға осылай деп батасын берді.
#TazaShym жалпықалалық тазалық іс-шарасы аясында Абай және Қаратау ауданының тұрғындары, А.Асқаров атындағы дендробақ директорының орынбасары Е.Төрехан, славян этномәдени бірлестігінің төрайымы Н.Романова, Жастар ресурстық орталығының жастары А.Асқаров атындағы дендрологиялық саябағы мен «Қасірет» мемориалы аумағын қоқыстан тазарту, көгалдандыру жұмысына қатысты.
– Акцияға қатысушылардың ерекше көңіл күймен, белсенділік танытып жатқаны қуантады. Ораза айт мерекесіне орай барлық қатысушыларға бауырсақ үлестірілді. Бұл да еңбек етіп жатқан азаматтарға серпін берді. Жалпы, үгінгі тазалық шарасына 2 мыңға жуық адам, 23 техника жұмылдырылған. Таңғы сағат 8-ден бастап тұрғындар Абай ауданына қарасты 4 локацияда жұмыс істеді. Акция барысында, 14867 шаршы метр көше бойы, 10,1 шақырым аяқ жол тазартылды. Сонымен қатар, 12300 түп ағаш діңі әктеліп, санитарлық қырқу жұмыстары жүргізілді. Қазірге дейін 120 текше метр қоқыс шығарылды, — дейді Абай ауданы әкімінің орынбасары Гүлнұр Асылбекова.
Е.Төреханның айтуынша, жастар ағаштардың діңін ақтаумен қатар, тұқымбақтағы ағаш көшеттерінің түбін арамшөптен тазартқан. Шымкентте республикалық «Таза Қазақстан» экологиялық акциясы басталғалы барлық жерлерде тазалық жұмыстары басталып кетті.
Бес аптаға созылаатын науқанға үшінші мегаполис тұрғындары барынша қолдау білдіріп, тазалық жұмыстарына белсенді қатысуда.
Ал бүгін Шымкентте #TazaShym атты жалпы қалалық тазалық іс-шарасы өткізілуде.
Бұл ауқымды іс-шара Қаратау ауданында да жүзеге асуда. Іс-шара барысында барлық ауданға қарасты елді-мекен аумақтарында тазалау жұмыстары жүргізіліп жатыр
Аудан тұрғындары, белсенді жастар «Т.Назарбеков» аллеясының аумағын, Ж.Шаяхметов көшесі мен Н.Назарбаев даңғылының, «Нұрсәт» шағын ауданы аумағын тазалап, қоқыстардан тазартты, ағаштарды әктеп, абаттандыру жұмыстарын жүргізді.
Іс-шараға тұрғындармен бірге танымал айтыскер ақын – Б.Байтуов, Қаратау аудандық ардагерлер кеңесінің төрағасы – А.Тоқмағамбетов, белсенді жастар және басқа да азаматтар қатысты.
Жалпы, еліміз бойынша өтіп жатқан акцияның мақсаты қаланы көркейту, абаттандыру, тұрғындар назарын айналасын таза ұстауға аудару.
Осы орайда қаратаулықтар «әр ай сайын тазалық акциясын өткізіп отыру керек. Сол кезде қаламыз да, ауданымыз да тазарып, жайнай түседі»-дейді.