Павлодарда теракт туралы хабарламадан кейін 22 мыңға жуық оқушы сабаққа бармаған

5 ақпанда Павлодар мектептерінде теракті болады деген хабар ата-аналарды шошытты. Нәтижесінде бүгін 22 мыңға жуық бала мектепке бармай қалды.
Павлодар білім бөлімі бүгін қаладағы барлық 43 мектепте сабақ қалыпты режимде өтіп жатқанын хабарлады. Бір күн бұрын полиция қызметкерлері барлық оқу орындарын тексерді. Тәртіп сақшылары күдікті немесе қауіпті заттарды таппаған. Алайда полиция барлық мектептерде қауіпсіздікті күшейтті.
Ал павлодарлық мектеп оқушыларының ата-анасы балаларын мектепке жіберуге қорықты. Бүгін 22 мың оқушы сабаққа қатыспады.
«Қауіпсіздік органдары қызу жұмыс істеп жатыр. Бейнекамералар мұқият қадағаланады. Сонымен қатар полиция бөлімшелерінің қызметкерлері қаладағы әрбір мектепте күзет қойды», — деді білім бөлімінің басшысы Қуаныш Қыдыралин.
Оның айтуынша, бүгін бірінші ауысымдағы 11 мыңнан астам бала мен екінші ауысымдағы 10 мыңнан аса оқушы сабаққа қатыспаған.
«Оның ішінде оқушылардың 12 пайызы дәлелді себептермен, қалғандары кешегі оқиғаға байланысты сабаққа келмеген», — деді Қыдыралин.
Ресми мәліметтерге сәйкес, Павлодардың барлық мектебі ескерту жүйесімен, полицияның кезекші пункттеріне және күзет қызметі субъектілерінің орталықтандырылған бақылау пультіне шығатын дабыл түймесі, орталық басқару орталығына бейне жіберуі бар бейнебақылау жүйесімен, турникеттермен жабдықталған. Бұл шаралар барлық ұйымда қабылданғаны атап өтілді.
Айта кетейік, бұған дейін Павлодарда белгісіз біреулер теракт болатыны туралы хабар таратқанын жазған едік. Белгісіз біреулер Павлодардағы бірнеше лицей, мектептер мен сауда орталықтарында адамдарды жаппай өлетіні туралы хабарлаған. Қорқынышты жазбалардың бірін 4 ақпанда құрылған жергілікті Telegram арнасы жариялаған. Автор балалардың жаппай атылуы туралы қоқан-лоқы бар бірнеше пост жариялап, оның ішінде қарудың суретін де қоса салған.