Қарағанды облысы Бұқар жырау ауданы Ботақара ауылында газ баллоны жарылып, екі адам қаза тапты.
Төтенше жағдай 30 қаңтарда жергілікті уақыт бойынша сағат 00:07-де Әуезов көшесіндегі екі қабатты, екі подъезі бар 12 пәтерлі тұрғын үйде болды. Мұны аудан әкімі Абылай Сұлтанғали Instagram желісінде мәлімдеді.
Жарылыстан кейін екінші қабат опырылып түсті. Оқиға орнында жедел штаб құрылды. Төтенше жағдайдың салдарын реттеуге 45 адам мен 13 техника жұмылдырылды.
Қазір үйінді астынан бес адам шығарылып, Ботақара ауылының орталық ауруханасына жөнелтілді. Зардап шеккен үйдің тұрғындары баспанамен қамтамасыз етілді. Оқиғаның салдарын жою үшін барлық қажет шара қабылданып жатыр. Жағдай облыс әкімінің бақылауында.
Қарағанды облысының төтенше жағдайлар департаментінде 8 (7212) 51-72-23 телефоны бойынша сенім телефоны жұмыс істейді.
