Студенттік жатақханадағы орындар проактивті форматта бөлінеді. Студентке өтініш жазудың қажеті жоқ.
«Жоғары және жоғары оқу орнынан кейінгі білім беру ұйымдарының жатақханаларында орындарды бөлу қағидаларын бекіту туралы» бұйрыққа осындай түзетулер жобасы қоғамдық талқылау үшін жарияланды.
Телефон нөмірін тіркегеннен кейін студент автоматты түрде мемлекеттік қызметті көрсету туралы хабарлама алады. Ол тек келісімді немесе қызмет көрсетуден бас тартуды жіберуі керек, содан кейін қажетті құжаттарды ұсынады.
Қағидалардың қолданыстағы редакциясына сәйкес, жоғары немесе жоғары оқу орнынан кейінгі білім беру ұйымының ақпараттық жүйелері және электрондық үкімет порталы арқылы өтініш қабылданады және мемлекеттік қызметті көрсету нәтижесі беріледі.
Еске сала кетейік, 2024 жылы 29 тамызда Қазақстанда студенттер үшін жатақханаға орын беру мәселелері бойынша жедел желі ашылды. Ғылым және жоғары білім министрлігі орталық тәулік бойы жұмыс істейтінін мәлімдеді. Алматыда жатақханалардың жетіспеушілігі мәселесі әлі шешілмеген. Былтыр қалаға келген 13 мыңға жуық студент баспанасыз қалуы мүмкін.
