«М.Әуезов атындағы ІТ-мектеп-лицей» КММ-де 2023 жылдың 20 қарашасында ғылым мен білімді ең басты қазынам, байлығым деп есептеп, білімнің ең биік шыңдарын бағындыруға жасаған оқушыларымыздың қадамдарының бірі – ауыл мектептері оқушыларына арналған жалпы білім беретін пәндер бойынша І республикалық «Ауыл олимпиадасының» салтанатты ашылуы болып өтті. Салтаннатты жиында мектеп директорының оқу ісі жөніндегі орынбасары Қабылбеков Ерұлан Шорабекұлы мен облыстық, республикалық олимпиадаға оқушы дайындаудың майталман ұстазы Қожатаев Қасым Әмірәліұлы құттықтау сөз сөйлеп, қатысушыларға сәттілік тіледі.
Олимпиаданың мақсаты — ауылдық жерлердегі мектеп оқушыларының дарыны мен қабілеттерін анықтау және оларға қолдау білдіру, неғұрлым академиялық қабілетті оқушыларды табу, олардың зияткерлік дамуы мен кәсіби бағдарлануына жағдай жасау.
Олимпиада үш кезең бойынша өткізіледі: бірінші кезең (бастапқы) – қараша айында; екінші кезең (іріктеу) – желтоқсан айында; үшінші кезең (республикалық) – 2024 оқу жылының қаңтар айында.
Ауыл олимпиадасының бастапқы кезеңіне қатысушы барлық шәкірттерге сәттілік пен шалқар шабыт тілейміз! Республикалық кезеңге дейін жетуге тілектеспіз.Алғаш рет ұйымдастырылған шара ҚР Оқу-ағарту министрі Ғани Бейсембаевтың тапсырмасы аясында қолға алынған. Олимпиаданың бірінші кезеңіне Түркістан облысынан 21 321 оқушы тіркеліп үлгерген. Олимпиадаға республикадағы ауылдық мектептердің соңғы екі оқу жылында оқитын 9-11(12) сынып оқушылары қатысып жатыр. Жарыс — ауылдық жерлердегі мектеп оқушыларының дарыны мен қабілеттерін анықтау және оларға қолдау білдіру, академиялық қабілетті оқушыларды табу мақсатында ұйымдастырылған.
— Ауыл мектептеріне арналған олимпиада Қазақстанның шалғай елді мекендеріндегі дарынды және талантты балаларды анықтауға және дамытуға бағытталған. Өткізу қағидаларына сәйкес, олимпиада 13 пән бойынша өткізіледі және 3 кезеңнен тұрады. Бастапқы кезеңге қатысу үшін аuyl.daryn.kz сайтында 85 401 оқушы тіркелді. Олимпиада «Бір компьютер – бір оқушы – бір камера» қағидаты бойынша өткізілді. Кезең қорытындысы орталықтың сайтында жариялатын болады, — дейді «Дарын» РҒПО директорының орынбасары Айгүл Қарқұлова.
Олимпиаданың ІІ іріктеу кезеңін желтоқсан айында облыстық білім басқармалары өткізеді. Тапсырмалар дәстүрлі олимпиадалық онлайн-платформада беріледі. Олимпиаданың III кезеңіне ІІ кезеңнің жеңімпаздары қатысады. III кезеңнің барлық қатысушылары республикалық сырттай мектепке қабылданатын болады.
Айта кетсек, жүлдегерлер ҚР Оқу-ағарту министрлігінің дипломдарымен марапатталады. Сондай-ақ, I дәрежелі диплом иегерлері 2024 жылғы жалпы білім беретін пәндер бойынша республикалық олимпиаданың қорытынды кезеңіне қатысады. Олимпиаданың салтанатты ашылу рәсімі 20 қараша күні еліміздің барлық ауыл мектептерінде бір мезгілде өткізіледі.