АРЫС: ПӘН АПТАЛЫҒЫ БАСТАЛДЫ

Арыс қаласының білім бөліміне қарасты Ташенов атындағы жалпы білім беретін мектебінде 13-24 қараша күндері аралығында «Балдәурен» бастауыш пән бірлестігінің пән апталығы басталды.
Апталық нәтижесінде «Білім басы бастауышта қаланар, білімменен әлемге жол салынар» тақырыбында мектепалды даярлық және 4 сыныптар аралығында пән мұғалімдері мектепішілік әдістемелік күнге ашық сабақтар өткізді.
Мақсат — бастауыш сынып оқушыларының танымдылық белсенділігі мен шығармашылығын дамыту, ой-өрісін, пәнге деген қызығушылығын ояту. Нәтижесінде оқушылардың әр сабаққа деген қызығушылығы мен белсенділігі артты.Барлық ашық сабақтар мен сыныптан тыс іс-шаралар жоғары әдістемелік деңгейде өткізілді. Айта кететін болсақ: «Мен қатесіз диктант жаза аламын», «Әдемі жазу – өнер» сайыстарында оқушылар көркем жазуларымен жарысқа түсті. Нәтижесінде сауатты, қатесіз жазатын оқушылар анықталды және марапатталды.
2-4 сыныптар арасында оқушылардың білімін шыңдауға бағытталған «Пәндер марафоны» ұйымдастырылды. Квест ойынында оқушылар бірнеше пәннен білімдерін сынап, қызу ойынға кірісті. Ойын жарыса отырып білім қуалаған оқушылардың көңілінен шықты.
Апталықтан ата-аналар да қалыс қалмады. 1 сыныптар арасында өткен «Көңілді эстафета» спорттық ойынында ата-аналар белсенділік танытып, жүлделі орындарға ие болды. Отбасы болып қатысқан ойынның жас ұрпаққа берер тәрбиесі мол болды.
«Кітап –көзі ашыққа маржан», «Кітап білім бұлағы», «Кітап білімнің қайнар көзі», «Менің алғашқы кітабым» тақырыптарында 1-4 сынып оқушылары өз қолдарымен жасаған кітапшалар көрмесін ұйымдастырды. Талантты да талапты оқушылардың өз қолдарымен жасаған туындылары таңқаларлықтай деңгейде болды.
Оқушылардың ертегі оқуға қызығушылығын арттыру мақсатында 1-4 сыныптар аралығында «Ертегілер еліне саяхат» атты қойылым болды. Әр сынып өздерінің оқыған ертегілерін көрсетіп, актерлік шеберліктерін паш етті.
Мектебіміздің мұғалімдерімен «Брейнг-ринг» интелектуалды ойынын Серикова А.А. мен Майшина А.К. жоғары деңгейде ұйымдастырды. Мұғалімдер белсенділік танытып, ойынның барлық кезеңдерінде қызыға жұмыс жасады.