ТҮРКІСТАН ОБЛЫСЫ: МЕДИАКРАТТАР МЕДИАФОРУМЫ ӨТТІ

Ахмет Ясауи университетінің қабырғасында «Медиакратия» қоғамдық бірлестігінің ұйымдастыруымен «Медиакраттар медиафорумы» өтті.
Жиынға ҚР Парламент депутаттары, Мәдениет және ақпарат министрлігінің өкілдері, танымал медиатұлғалар, бірқатар өңірлердегі медиахолдинг басшылары, еліміздегі жетекші БАҚ өкілдері, университеттегі Журналистика кафедрасының оқытушылары мен студенттері қатысты.
Басқосуға себеп болған негізгі тақырып – «Масс-медиа туралы» Заң және журналистика тағдыры. Форумның негізгі мақсаты – журналистикадағы реформалардың бірізділігін қалыптастырып, БАҚ саласындағы мемлекеттік тапсырыс ісіне өзгерістер енгізу, жаңадан қабылданып жатқан «Масс-медиа туралы» туралы Заңда отандық журналистиканың өзекті мәселелерін терең зерттеп, жеткізу.
Медиафорумға арнайы қатысқан университет ректоры Жанар Темірбекова қазіргі таңдағы отандық журналистиканың, аймақтық баспасөз беттері мен телеарналардың тағдыры көпшілікті алаңдатып отырғанын атап өтті.
Онлайн және офлайн форматта ұйымдастырылған медиафорумда танымал спикерлер отандық медиа саласының бүгіні мен болашағы, ұлттық және аймақтық журналистиканың өзекті мәселелері, «Масс-медиа туралы» заң жобасына қатысты сарапшылық пікірлерін ортаға салды.
Басқосуды модератор ретінде жүргізген Түркістан облыстық мәслихатының депутаты, «Медиакратия» қоғамдық бірлестігінің төрағасы, танымал журналист Ғалымжан Елшібай ақпараттық саясат саласының күн тәртібінде тұрған заң жобасын қабылдарда аймақтық журналистика өкілдерінің талап-тілектері ескерілуі тиістігін атап өтті.
Белгілі қоғам қайраткері Дархан Мыңбай, ҚР Парламент Мәжілісіндегі «Масс-медиа туралы» заң жобасы бойынша жұмыс тобының жетекшісі, депутат Жанарбек Әшімжан, Парламент Сенатының депутаты Бибігүл Жексенбай, Мәдениет және ақпарат министрлігінің БАҚ саласындағы мемлекеттік саясат департаментінің директоры Қайнар Ахетов пен Оралхан Дәуіт, Серік Әбікенұлы, Жұлдыз Әбділдә, Есенгүл Кәпқызы, Молдияр Ергебеков секілді бірқатар белгілі журналистер тақырып төңірегіндегі ойларымен бөлісті.
Айта кетейік, медиафорумның қорытындысы бойынша салалық министрлікке және Парламентке «Масс-медиа туралы»заң жобасына қатысты ұсыныстар жолданатын болады.