ТҮРКІСТАН: САЙРАМ АУДАНЫ ЖЕКЕМЕНШІК МЕКТЕП САЛУДАН ӨҢІРДЕ АЛҒАШҚЫ ОРЫНДА ТҰР

Қарамұрт ауылдық округіндегі «Парасат» жекеменшік мектебі ашылған еді. Аталған 500 орындық білім ордасы толық заман талабына сай етіп жасалған. Бүгінде білім нысанында 50-ден аса білікті ұстаз жұмыс істеуде.
Биыл жаңа оқу жылында 3566 орындық 7 жекеменшік мектеп ашылады деп жоспарлануда. Жалпы Сайрам ауданы жекеменшік мектеп салудан өңірде алғашқы орында тұр. Сондай-ақ, ауданда 7962 мұғалім жұмыс істейді.
Аудан әкімі жаңа мектептің ұстаздары мен ата-аналарын және оқушыларды айтулы күнмен құттықтап, табыс тіледі.
«Ауданымызда 64 мыңнан аса озушы білім алады. Бұл облыстағы үлкен көрсеткіш, әрбір 8 бала Сайрам ауданында білім алады деген сөз. Биылғы оқу жылында 201 білім беру мекемелері жұмыс атқарады. Оның ішінде 74 мемлекеттік және 22 жекеменшік мектептер. Сондай-ақ, 11 мемлекеттік пен 83 жекеменешік балабақшалар жұмыс істейді»,- дейді аудан әкімі Арман Сәбитов.
Жаңа мектепте мультимедиялық оқу залдары, заманауи жабдықталған физика, химия, биология, информатика, интербелсенді тақталарымен жабдықталған, технология кабинеттері жабдықталған. Жобалық құны 400 млн. теңге.
Қазіргі таңда облыста 9 үш ауысымды, 8 апатты мектеп болса, ал, оқушы орынының тапшылығы 30 мың орынды құрайды. Мемлекет жоспарына сәйкес аталған мәселені 2025 жылға дейін шешу жоспарланған. Жаңа оқу жылының басталуында облыста 17 жекеменшік мектеп (жалпы көлемі 5 мыңнан астам орындық) пайдалануға беріледі. Нәтижесінде облыстағы жекеменшік мектептер саны 110-ды құрап, онда 30 мыңға жуық оқушы білім алатын болады. Ал жыл соңына дейін тағы 7 жекеменшік мектеп ашылуы жоспарланған.
Облыс колледждеріне биылғы жылға кәсіптік білім алуға ниетті жастар үшін колледждердегі мемлекеттік тапсырыс көлемі артты. Республикалық бюджеттен қаралған 15 300 грант 43 колледж арқылы толық игерілді. Өткен жылмен салыстырғанда колледж студенттері 4 мыңға көбейді. Мамандық түріне қарай бір студентке бюджеттен бөлінетін жылдық оқу құны 850 мың теңге мен 1 млн. теңге аралығында. Биыл гранттарды орналастыруда ашықтық қағидаты қатаң сақталды. Оқуға ниетті жастармен тек білім саласының қызметкерлері ғана емес облыстағы Жастар ресурстық орталықтары да тығыз жұмыс жүргізген. Қыркүйек айынан бастап колледж студенттерінің шәкіртақысы 22 мыңнан 32 мыңға, ал 2024 жылдан бастап 42 мыңға артады.