Бүгін оқу ордамызда ІІ Түркі универсиадасына қатысушы Әзербайжан, Қырғызстан, Түркия, Мажарстан, Өзбекстан және Қазақстан делегацияларының ресми өкілдерінің басқосу конференциясы өтті.
Конференцияда сөз бастаған университет ректоры Жанар Темірбекова универсиадаға қатысушы мемлекет өкілдерімен киелі Түркістан шаһарында, түркі жастарының басын қосқан білім ордасында жүздескеніне қуанышты екенін жеткізді. Сондай-ақ, 10 –қарашаға дейін жалғасатын аталмыш универсиаданың маңызына тоқталды.
Сөз тізгінін алған ҚР Ғылым және жоғары білім вице-министрі Талғат Ешенқұлов та өзінің ізгі тілегімен қоса түркі мемлекеттері үшін маңызды шара жөнінде өз ойымен бөлісті:
«ІІ Түркі универсиадасының мақсаты – спорттық жарыстар арқылы Түркі жұртының жас спортшыларын біріктіру, сондай-ақ олардың арасындағы достық пен бауырластықты нығайту»,-деді.
Сонымен қатар, Мемлекет басшысы Қасым-Жомарт Тоқаевтың 2022 жылы Түркі мемлекеттері ұйымының саммитінде Қазақстан түркі әлемінің ата жұрты ретінде, елімізде түркі универсиадасын өткізу туралы мәлімдесінің маңызына тоқталды. Универсиада аясында тарихы тамырлас түркі жұртының өзара ынтымақтастығы арта түсетініне сенетінін білдірді.
Жиын барысында универсиаданың негізгі бағдарлама легі мен спортшылар өзара бәсекеге түсетін спорттық ойындар, жалпы ережелермен таныстыру жүрді.
Сондай-ақ, Әзербайжан, Қырғызстан, Түркия, Мажарстан, Өзбекстан және Қазақстан делегаттары түркі универсиадасының өтілуі жалпыға ортақ қуаныш екенін жеткізді. Өз мемлекеттерінің атынан дүбірлі доданы өткізуді қолға алған Қазақстанға алғыстарын білдірді.
Конференция соңы бауырлас, түбі бір түркі жұрты өкілдерінің естелік фото түсірілімімен аяқталды.
