Бұл туралы Шымкент гарнизонының баспасөз қызметі мәлімдеді. Шымкенттегі Әуе шабуылына қарсы қорғаныс әскерлерінің бригадасында жаңадан келген жас толымның әскери ант қабылдау рәсімі өтті. Бұл туралы Шымкент гарнизонының баспасөз қызметі мәлімдеді. Алматы қаласынан шақырылған отыз әскери қызметші Отанына адал қызмет етуге ант берді. Осы айтулы күні әскери бөлімнің басшылығы мен әскери қызметшілері, Қарулы Күштердің ардагерлері мен «Жас сарбаз» әскери-патриоттық қозғалысының тәрбиеленушілері және жауынгерлердің ата-аналары мен жақын туыстары жас сарбаздарды қолдап әрі құттықтауға жиналды. Бөлім командирі полковник Орынбасар Жұбанов әскери қызметшілерге ант қабылдаумен жүктелетін құрметті және жауапты міндеттің маңыздылығын еске салды.
— Әскери қызметшілер бір рет ант береді, содан кейін өмір бойы өз антына адал болады. Бұл әрбір жауынгердің өміріндегі ең маңызды оқиға, — деп атап өтті бөлім командирі полковник Орынбасар Жұбанов. Әскерге бір ай бұрын шақырылған Құдайберді Медетұлының ант қабылдау рәсіміне куәгер болып, қолдау көрсетіп, қуанышына ортақ болу үшін қасында анасы Марал мен тәтесі Мақпал Төлегенқызы Алматыдан арнайы келіпті.
— Бұл күн біздің жүргемізде ерекше орын алатыны анық, біз қуаныштымыз! Мен бірінші рет ант қабылдау рәсіміне келдім, ана ретінде маған бұл өте әсерлі сәт. Мен әскери бөлімнің басшылығымен сөйлестім және ұлымның Әуе шабуылына қарсы қорғаныс әскерлерінде қызмет етуге келгеніне өте қуаныштымын, — деп бөлісті Марал Төлегенқызы.
— Біз екі қатарға тұрып, қару-жарақпен тұрдық. Жауынгерлік ту біздің жанымыздан өтті. Бөлім командирімен амандасқаннан кейін, біз бөлек сап түзеп, ант сөздерін оқыдық. Мен өз елімнің қорғаушысы атанғанымды мақтан етемін, — деп мойындады Құдайберді Медетұлы. Айта кетейік, жас сарбаздар әскерге шақырылғаннан кейін бір ай ішінде алғашқы әскери дайындық курсынан өтіп, саптық, дене шынықтыру, атыс даярлығының, жалпы әскери жарғылардың негіздерін оқып, оқу полигонында практикалық атыстарды орындады. Алда олар механик-жүргізуші, радиотелеграфист, планшетші, электрик және басқа да көптеген мамандықтарды игереді.
