Дарынды оқушылардың мерейі үстем болды. Мақтаарал аудандық білім бөлімінің ұйымдастыруымен «Мақтаарал» мәдениет үйінде «Кемел келешек кілті — білімде» тақырыбында жалпы білім беретін пәндер бойынша республикалық олимпиаданың облыстық кезеңінің жеңімпаздары мен жүлдегерлерін және спорт жеңімпаздарын марапаттау шарасы өтті.
Салтанатты шараға Мақтаарал ауданының әкімі Бақыт Асанов, Мақтаарал аудандық білім бөлімінің басшысы Мұратбек Серікбаев, “Аманат” партиясының төрағасы Мұхтар Сарсенов, аудандық кәсіподақ комитетінің төрағасы Алданияз Жолдасов қатысып, үздіктер мен білім мекемелерінің басшыларын, пән мұғалімдерін және ата-аналарын құттықтап, медальдары мен дипломдарын табыс етті.
Сонымен қатар аудандық кәсіподақ комитетінің төрағасы А.Жолдасов жеңімпаз оқушылардың пән жетекшілеріне демалыс орнына тегін жолдама сертификатын табыстады.
«Мінеки, араға жыл салып, озат оқушыларымыз тағы да облыстық пән олимпиадасында биіктерден көрініп, баршамызды қуантып отыр. Бүгінгі қуаныштан туындап отырған сезімді Сіздер жақсы түсінесіздер, өйткені бұл қуаныш — сіздердің еңбектеріңіздің жемісі. Біз сіздерге үлкен сенім арттық. Ұстаздар, Сіздер әр кезде де біздің оқушыларымыздың биіктерден көрінуіне аянбай еңбек етіп келесіздер. Шәкірттеріңіздің құрметіне бөлене беріңіздер. Шығармашылық ізденістер мен ғылыми жаңалықтарыңыз арта берсін» — деді, Бақыт Насырханұлы.
Іс-шара барысында аудандық кәсіподақ комитетінің төрағасы А.Жолдасов жеңімпаз оқушылардың пән жетекшілеріне демалыс орындарына тегін жолдамалардың сертификаттарын табыстады.
Ауданның адами әлеуетті дамыту бөлімінің басшысы М.Серікбаев олимпиада жеңімпаздары – Қазақстан келешегінің интеллектуалды тірегі мен ұстаздардың мақтанышы екенін атап өтті. Сонымен қатар, еліміздің даңқын асырып, биік жетістіктерге жеткізер мектеп мақтаныштары – олимпиада жүлдегерлері мен талантты да қабілетті ұландардың қабілеттерін шыңдап, дайындаған барлық пән мұғалімдері мен оқушыларға алғыс білдірді.
