Түркістан облысы білім басқармасының басшысы Дінислам Болатханұлы жұмыс сапарымен Түлкібас ауданына барып, облыстық семинарға қатысты. “Білім беру ұйымдарында қаржылық есептілік пен қаржыландырудың айқындығын қамтамасыз ету және цифрландыру” тақырыбындағы жиынға аудан/қалалық білім бөлімдерінің басшылары мен бас есепшілері де бой көрсетті.
Облыстың бас ұстазы “Фаворит” жүйесі — қағазбастылықтан арылтып, есеп-қисаптың автоматтандыру арқылы ашықтықты көрсете алады дейді.
Бастама алдымен Түркістан, Кентау қалаларымен Түлкібас ауданының білім беру ұйымдарына 2023 жылдың 9 қаңтарынан бастап пилоттық режимде іске қосылған. Қазірге таңда, Түлкібас ауданы білім бөліміне қарасты 60 орта мектепке “Фаворит” бұлтты бухгалтериясы сынақтан өтіп, жоғары көрсеткіш көрсетті. Мамандар, дәл осы сандық жүйенің қыр-сырын меңгеріп, әріптестермен тәжірибе алмасты.
Түлкібас ауданы білім бөлімінің басшысы Ержан Ізтайұлы баяндама оқып, «Фавориттің» негізгі артықшылықтары мен жүйені енгізу барысындағы жұмыстармен бөлісті. Бөлім басшысы сандық жүйені енгізудегі кедергі тұрақсыз интернет екенін алға тартты. Бөлімдегі интернет провайдерінің де, ішкі желінің де мәселелері барын жасырмады. Оны шешу үшін цифрландыру басқармасына хат жолданған.
Бірыңғай бұлтты бухгалтерия өз кезегінде, барлық бөлімдерді есепке алуға қауқарлы. Жүйеде министрліктің 456- бұйрығына сәйкес білім беру ұйымдары үшін есепке алудың барлық бөлімдері іске асырылды. Жүйе рөлдер мен өкілеттіктерді қатаң бөлетін шектеусіз пайдаланушыларды ұсынады. Қазақстандық платформа ақпараттық қауіпсіздіктің 5 деңгейі бойынша сертификатталған. Сатып алу порталымен интеграция бар. Ол сатып алу процесін автоматтандырып, орындалуын бақылауға мүмкіндік береді. Сондай-ақ, білім берудегі есеп, біліктілігі, өтілі және т. б. бойынша егжей-тегжейлі мәліметтері бар оқытушының цифрлық карточкасы, білім берудегі бұйрықты есепке алу процесі автоматтандырылған.
