Сарыағаш ауданының білім бөліміне қарасты №69 ЖОББМ 5-11 сынып оқушыларының «Техникалық шығармашылық және өнертапқыштар» (әуе, зымыран, көлік, кеме құрастыру) республикалық жарысының аудандық кезеңі өтті. Сайыстың мақсаты Қазақстан Республикасында балалардың техникалық шығармашылығын дамыту, тұлғаның шығармашылық құзыреттілігінде бәсекелестік артықшылықтарын қалыптастыру, білім алушылардың өзін-өзі кәсіби анықтауы үшін жағдай жасау.
Техникалық шығармашылық және өнертапқыштардың жарысы бағдарламасының аясында әуе, зымыран, авто және кемемоделдеу бойынша шығармашылық жұмыстардың көрмесі ұйымдастырылды; робототехника, авто және кемемодельдеу бойынша жарыстар өтті.
Жарысқа аудандағы жалпы білім беру ұйымдарының шығармашыл, өнертапқыш оқушыларынан 5 номинация бойынша 29 оқушы қатысты. Оның ішінде әуе, авто, кеме, зымыран модельдеу және робототехника бойынша 6 жеңімпаз анықталып, облысқа жолдама алды.
Еске салсақ, Мемлекет басшысы Қасым-Жомарт Тоқаев еліміздің болашағы жарқын болуы үшін келешек ұрпаққа осы бастан жіті көңіл бөлу керек екенін айтқан болатын-ды. Осы орайда, жастарға, әсіресе кішкентай бүлдіршіндерге барынша жағдай жасау қажеттігін ескерте отырып, биылғы 2022 жылды «Балалар жылы» деп жариялаған болатын. Шындығында, келешек ұрпақтың көзі ашық, болашаққа деген үміті зор болуы үшін қазір жасалынды деп жар салып жүрген тірліктердің барлығы аз. Бірақ аз деп қана отырмай, келешек ұрпаққа ата-анадан бастап, тұтас мемлекетіміздің жағдай жасауы маңызды. Ең бірінші, мемлекеттің қолдауы қажет, себебі елімізде оң-солын танып үлгермесе де, болмашы заттан ойыншық құрастыра алатын дарынды балалардың саны күн санап көбейіп келеді. Ал осындай дарынды балаларға елімізде қандай қолдау жасалынып жатыр дегенге келсек, Қазақстанның арнайы білім беретін мектептерінде робототехника кабинеттерінің үш мыңға жуығы ашылды. Оның ішінде, балалардың қызығушылығын арттыру мақсатында барлық кабинеттер арнайы көрнекі құралдар мен компьютерлік қондырғылармен жабдықталған.
Сондай-ақ оқушыларға робототехника қосымша пән ретінде енгізілді. Ал мұғалімдері робототехника бойынша арнайы пәнді игерді. Түркістан облысында да робототехника сыныптары жүйелі жұмыс атқаруда. Облыста 9 ІТ мектеп, 70 ІТ сынып және 69 робототехника сыныптары жұмыс істейді. Балаларды жаңа техника, робот жасауға қызығушылығын арттыру мақсатында өңірде түрлі іс-шаралар өтуде.