Ұстаздар жайында халқымыздың ұлы батыры Бауыржан Момышұлы былай деген: «Ұстаздық – ұлы құрмет. Себебі, ұрпақтарды ұстаз тәрбиелейді. Болашақтың басшысын да, данасын да, ғалымын да, еңбекқор егіншісін де, кеншісін де ұстаз өсіреді. Өмірге ұрпақ берген аналарды қандай ардақтасақ, сол ұрпақты тәрбиелейтін ұстаздарды да сондай ардақтауға міндеттіміз».
Әлемде мамандықтың түрі өте көп. Десе де ғалым да, шахтер де бас иетін маман – ұстаз атты тұлғаның мәртебесі қашан да биік. Тарыдай болып кірген шәкіртін таудай қылып шығаратын бойындағы білім нәрімен сусындатып, ұлы тұлға жасайтын мұғалімдердің еңбегі ерен. «Ұстаздық еткен жалықпас үйретуден балаға» деп хәкім Абай айтпақшы оқушысын өз баласындай бауырына басып тәрбилейді. Ұстаз – таудан арқырай аққан тау өзені секілді, айналасына қуат беріп, жолында кездескендерді суымен нәрлендіріп, таудай қиындықтарды тастай домалатып, білімнің сар даласында тыныштық тауып, дамылдайды. Ұстаз ұлы тұлға. Кемелденген дарынды ұстаздардың шын аламан бәйгеде шынығуы, өз білімін шыңдауға қажет дүние.
Міне осы мақсатта №32 Қ.Аманжолов атындағы жалпы орта мектебінде мектеп директорының басшылығымен жыл қорытындысы бойынша «Жылдың үздік мұғалімі — 2023» байқауы өткізілді. Білім додасы 2 бағыт бойынша өтті. Біріншісі жылдың үздік мұғалімі болса, екіншісі жылдың үздік сынып жетекшісі бағыты болып отыр.
Байқау шарттары:
1. Видеоролик (таныстыру)
2. Презентация
3. ЭССЕ жазу
4. Ситуациялық сұрақ
5. Бүктемелер
Байқау нәтижесі бойынша:
Байқауға қатысушылар өздерінің педагогикадан, психологиядан және әдістемеліктен білімін, педагогикалық еңбектен жоғары мәдениеттілігін, практика жүзінде инновациялық технология бойынша жоғары білім деңгейін көрсете білді. «Жылдың үздік мұғалімі» атағын тыңғылықты дайындық пен біліктілігінің арқасында қазақ тілі мен әдебиет пәні ұстазы Базарбаева Айгүл Тағайқызына бұйырды.»Жылдың үздік сынып жетекшісі» премиясын өткір идеясы мен, озық тәлімгерлік таланты үшін ағылшын пәні мұғалімі Азимбаева Жанат иеленді.
Криативті жан-жактылығымен ерекшеленген барша ұстаздар мектеп басшысының арнайы жүлделерімен марапатталды.
Байрақты бәсеке тартысты өтті. Ұлағатты ұстаздардан құралған қазылар алқасы барша әріптестерге оң бағасын берді.
Ұстаз талантты болса, шәкірті талапты болады дегендей мықты ұстаздар білім бәйгесінде шыныға білді. Байқауға қатысып озық идеялы білімдерімен тәжірибе алмасты.
