Сайрам ауданында оқушылар арасында жасақталған алты команда облыстық мектеп лигасында жеңіс тұғырынан көрініп, республикалық мектеп лигасында топ жарды.
Биылғы 20 сәуір мен 10 мамыр күндері Павлодар және Астана қалаларында өткен республикалық жарыста сайрамдық қыздар командалары үздік нәтиже көрсетті. Тарқата айтсақ, 10 команданың ішінен Далабазар жалпы орта мектебінің баскетбол командасы мен №62 М.Анартаев атындағы жалпы орта мектебінің футбол командасы I орынды иеленді.
Сонымен қатар, жарысқа қатысқан Айша бибі атындағы жалпы орта мектебінің футбол командасы ІІ орынды, №3 Хамза және №42 Фурқат атындағы жалпы орта мектебінің волейбол командалары 19 команданың ішінде 5 орынға тұрақтады.
Ауданға жеңіспен оралған үздік ойыншыларды аудан әкімінің орынбасары Мадияр Оразалиев қарсы алып, жаттықтырушылар мен балаларға арналған гүл шоқтары мен сыйлықтарын табыстады.
Айта кетсек, алдағы маусым айында 5-6 сынып оқушылары арасында Алматы облысында өтетін республикалық жарыста Далабазар жалпы орта мектебінің оқушылары баскетболдан бақ сынайды.
Ұлттық мектеп лигасы аясында футбол, баскетбол, гандбол, волейбол спорт түрлерінен өтетін жарыста оқушыларға спорт мектебінен бапкер, кәсіби маман бекітілген. Лига жарыстары чирлидинг, яғни үйлесімді спорт түрі форматында ұйымдастырылады. Әр мектеп командаларының өз логотиптері мен ұрандары жасалған. Командалар арнайы спорттық формаларымен қамтамасыз етілген. Мектеп оқушыларына жарысқа арнайы автобустар тасымалдайды. Ұлттық мектеп лига жарыстарының негізгі мақсаты – жасөспірімдер арасында бұқаралық спортты дамыту, салауатты өмір салтын насихаттау, оқушылардың бос уақытын тиімді ұйымдастыру. Лига жарыстары барысында жасөспірімдер арасында командалық рух қалыптастыру және ауылдық, аудандық, облыстық деңгейде қоғамдық өмірге белсене атсалысатын лидер, көшбасшыларды топтастыру. Облыстық спартакиаданың кезеңі қаңтар айында мектепішілік команда жасақталып, аудандық чемпион команда анықталады. Бұл лигада облыстағы ең үздік деген спортшы оқушылар өнер көрсетеді. Жеңімпаз болған спорт командасы, облыстық, республикалық, халықаралық мектеп оқушылары арасында спорттан жарыстарға қатысып, ел намысын қорғайды. Наурыз айында облыстық чемпионатта әр аудан, қаладан үздік командалар өзара облыстық іріктеуге қатысып, чемпион командалар марапатталады.
