Облыс әкімінің орынбасары Б.Тәжібаев тарапынан берілген тапсырмаға және кестеге сәйкес, аудандық адами әлеуетті дамыту бөлімінің ұйымдастыруымен Қ.Жандарбеков атындағы аудандық мәдениет үйінде арнайы кездесу өтті.
Жиынға аудандық адами әлеуетті дамыту бөлімінің басшысы Гульнара Тынымбаева, тиісті құзырлы және құқық қорғау органдарының басшылары, белсенді ардагерлер, білім қызметкерлері, ата-аналар және жастар қатысты.
Мақсаты – әлеуметтік-мәдени ортаны қалыптастыру арқылы балаларға қатысты зорлық-зомбылықтың алдын алу. Нақты айтқанда, кәмелетке толмаған жасөспірімдер арасындағы құқықбұзушылық пен қылмыс, оқыс оқиғалардың, ертежүктілік пен суицидтердің алдын алу, жасөспірімдердің психологиялық ахуалына талдау, олардың қоғамдағы белсенділігін арттыру, бос уақытын тиімді пайдалану, бала тәрбиесіндегі ата-аналардың және сынып жетекшілерінің, мектеп басшылығының, білім бөлімі мен қоғамның рөлін арттыру.
Кездесуде «Жасөспірім және заң» тақырыбында кәмелетке толмағандардың қатысуымен жасалатын қылмыс пен құқықбұзушылықты және оқыс оқиғаларды алдын алу мәселелері талқыланды. Сонымен қатар, мектеп және отбасындағы бала тәрбиесіне арналған бейнероликтер көпшіліктің назарына ұсынылды.
Күн тәртібіндегі мәселеге қатысты аудан әкімінің орынбасары Мадияр Оразалиев, аудан прокуроры Даулет Тлемисов, Түркістан облысының адами әлеуетті дамыту басқармасының тәрбие және қосымша білім беру бөлімінің басшысы Кайрат Арап, ауданның полиция басқармасының бастығы Б.Зиятаев, әлеуметтік-сүйемелдеу орталығының сектор меңгерушісі Галым Медеуов жастармен атқарылған жұмыстарды баяндады.
Кейінгі кезекте психолог мамандары №16 жалпы Т.Бигелдинов атындағы орта мектептің педагог-психологі Ш.Әбдірахманова және магистр У.Тураева тақырып аясында ұсыныс-пікірлерін айтты.
Шара соңында Сайрам ауданының Құрметті азаматы, ұстаз ардагер А.Қабылбеков кездесуді қорытындылады.
