Сарыағаш ауданы адами әлеуетті дамыту бөліміне қарасты №64 А.Байтұрсынов атындағы жалпы орта білім беретін мектебінде «А.Байтұрсынов — ұлтымыздың ұлы ұстазы» атты ғылыми жобалар байқауының аудандық кезеңі болып өтті. Жиын басында мектеп директоры Сейтова Қаламқас Туртаевна сөз алып, ғылыми жоба байқауына қатысушы оқушыларға сәттілік тіледі.
Ахмет Байтұрсынұлы ұлтының болмысын терең таныған ғалым. Яғни барша мұң-қайғысының, арман-тілегінің, жарқын болашағының қайдан екенін терең зерделеген және оған жетудің жолдарын да жақсы білген. Біздіңше, Ахаңның ғалымдығын екі түрлі ерекшелік бойынша бағалауымыз керек: біріншіден, ұлт қажеттілігін өтеуге арналған көркем шығармаларын жинақтап, жүйелеуде де ғылыми ойлау әлеуетінің кейбір қырлары көрініс береді. Халықтың сол тұстағы экономикалық, әлеуметтік-тұрмыстық, қоғамдық-психологиялық ахуалын терең зерделеп, соған лайық тақырыптардағы шығармаларды ұсынады. Екіншіден, қазақ ғылымының алтын бастаулары ретінде ғылыми-теориялық еңбектерінің маңызы аса жоғары.
Қазақтың арғы-бергі тарихынан терең сауатты болғандықтан, оның басындағы ахуалдың себеп-салдарын да жақсы түсінген. Қиындықтан құтқарудың жолдары ең бірінші халықты ояту мен білімге жетелеуде деп білді. «Халыққа не керек?» деген сұрақтың жауабын іздейді. Бодандықта тұрған жұрттың баршасына ортақ қиындық пен қазақ халқының басындағы ерекше тағдырдың арасында үлкен айырмашылық бар. Отарлаушы ел мен бодандықтағы халқының тұрмысы да, салты да, өмірлік ұстанымдары мен дүниетанымы да бір-біріне ұқсамайтын. Мұндай жағдайдағы қайшылықтың салдары бодан елге аса ауыр соққы болатыны белгілі. Тұрмысы, дәстүрі, тілі, жалпы алғанда, барша мәдениеті мен ұлттық психологиясы дағдарысқа ұшырайды. Ғасырлар бойы санасына сіңген дәстүрлері қолданыстан ығысып, жарамсыз күйге түскенде халық үлкен тығырыққа тіреледі екен. Тегі бөтен шаруашылыққа адамның бірден икемделе кетуі қиын, ақыл мен денеге тосын салмақ түскен соң қиналады, жасиды, оның ақыры бойкүйездікке алып келеді. Осылайша, қазақ халқының үстінен зіл қара күш басты, «қараңғылық» міні тағылды. Бүгінде «қазақ неден осындай болды?» деп, біз іздеп жүрген көптеген сұрақтардың жауабын Ахаң сол тұста терең түсінген еді.
Айта кетсек, ғылыми жобаға қатысқан оқушылар ұлт ұстазы туралы мәлімет жинап, ғылыми жұмысын қорғады. Мектеп ұжымының шағын концерттік бағдарламасы қатысушы оқушыларға керемет көңіл-күй сыйлап, ғылыми жобаның өз деңгейінде өтуіне ықпал жасады. Сайыс жеңімпаздары болса облыстық кезеңге жолдама алды. Барлық окушыларға сәттілік тілейміз!
