Азамат Абдураимов республикалық пәндер олимпиадасының қатарынан екінші рет жеңімпазы атанды. Шымкент қаласындағы физика-математика бағытындағы Назарбаев Зияткерлік мектебінің оқушысы Азамат Абдураимов орыс сыныптарына арналған қазақ тілі республикалық гуманитарлық олимпиадалар сайысында III орын иеленді. Ол бұған дейін NIS-тің желілік жарыстарында жүлделі I,II орындара, республикалықта I орыннан бой көрсетіп жүр.
— Қазақ тілі ана тілім болмағанымен мен үшін өте жақын. Себебі ұлтым өзбек бәріміз түркі тілдес халықпыз. Дегенмен олимпиада терең білімді қажет етеді сондықтан үнемі дайындық қажет, – деді Азамат Абдураимов.
Қазақ тілі мен әдебиеті пәнінің мұғалімі Бота Құлжаева оқушысының өте жауапты екенін ескеріп сайыстарда мектеп намысын қорғауға дайындайды. Азамат жаратылыстану бағытына жақын болғанына қарамастан келешекте гуманитарлық олимпиада жеңімпазы болуға дайындықты жалғастыруды көздеуде.
Айта кетсек, республика көлемінде өтетін олимпиаданың мақсаты мен міндеттері – оқушының жеке тұлға ретінде өзін-өзі қалыптастыруда шығармашылық қабілеттерін дамыту, теориялық білім мен практикалық дағдыларын тереңдетуін жүзеге асыруына ықпал ету, дарынды балаларды анықтауға жағдай жасау, оқушыларды халықаралық олимпиадаларға қатысуға іріктеу және дайындау, сондай-ақ, Қазақстан Республикасындағы білім беру жүйесінің беделін арттыру.
