Ұстаз — ұлағатты ұғым. Әр адамның жүрегіне ерекше жылулық нұрын себетін аяулы тұлға бейнесімен өзектес ұғым. Адам баласының жүрегінде қадір тұтып, құрметтейтін екі ұғым болса, соны бірі – Ұстаз. «Ұстаз» қазақ баласы үшін қашан да қадірлі болған. «Ұстаздан тәрбие алған» немесе «Ұстаз алдын көрген» деген сөздер құлаққа «ана тәрбиесін алған» деген сөздермен ұштасып жатады.
«Ұстаз» деген асыл ұғым – бұл қайнап жатқан қоғам өміріне, оның ішінде бала өмірінің үлкен мұратына үлес қосар, нардың белін қайыстырар қыруар жүкті көтеріп келе жатқан тұлға дер едім. Ұстаз өзінің биік парасатын өтеу жолында, қазіргі сансыз өзгерістер болып жатқан уақытта, соның ішінде білім беру жүйесі жаңарып, мәні өзгерген салада болашақ жастарды біліммен сусындатып, әрқашан қамқорлық жасауға ұмтылады.
“Жанкент”жалпы орта мектебінде Түлкібас ауданының адами әлеуетті дамыту бөлімінің мектепке дейінгі ұйым мен мектепалды даярлық сыныптары және бастауыш сынып педагогтары арасында ауданның онкүндік жоспарына сәйкес ұйымдастырылған “Жаңа мектепке -жаңашыл ұстаз” тақырыбында байқау өткізілді.
Байқаудың мақсаты білім беру ұйымдарындағы талантты педагогтерді анықтау, педагог еңбегінің дәрежесін көтеру , шығармашылықпен жұмыс жасайтын, ізденімпаз жас мамандардың мәртебесін арттыру болып табылады.
Байқау үш кезеңнен тұрады.
Бірінші тапсырма- “Жаңа мектепке-жаңашыл ұстаз” тақырыбында эссе жазу болса, екінші тапсырма- “Шығармашылық жолдың бастамасы “ тақырыбында өзін-өзі таныстыру болған еді. Үшінші тапсырма бойынша ұстаздар “Ашық сабақ “ өткізу қажет. Яғни, педагог өз сабағын қорғап шығады.
Байқауға мектепалды даярлық сынып, бастауыш сыныптан және мектепке дейінгі ұйымдардан жалпы- 23 педагог қатысып, өз білімдерін сынға салды.Педагогтер өздерінің алып келген жұмыстарын көрсетіп және әріптестерінің жұмысын көріп, өзара жақсы тәжірибе алмасты. Байқау жоғары деңгейде өтіп, жеңімпаздар анықталды. Олар арнайы марапатталып, мектепке дейінгі ұйымдардан “Балдырған” балабақшасының тәрбиешісі, мектепалды даярлық сыныптардан “Жанкент”жалпы орта мектеп тәрбиешісі және бастауыш сыныптан М.Ломоносов атындағы мектеп-гимназиясының ұстазы суырылып алға шықты. Жеңімпаз педагогтер алдағы облыстық байқауға жолдама алды.
