Биыл Чернобыль апатына 37 жыл. Бұл- адамзат тарихындағы ең сұмдық техногендік апаттардың бірі. Сондай-ақ, дүниежүзі тарихындағы ең ірі жарылыстың бірі болды. Украинағы Чернобыль алапат апаттың зардабын жоюға бұрынғы Кеңес Республикаларынан 600 мыңға жуық адам жұмылдырылды. Оның 35 мыңға жуығы қазақстандық азаматтар болды. Өкінішке орай, Чернобыль зардабын ардагерлеріміз әлі күнге тартып келеді. Бүгінгі таңда елімізде Чернобыль апатының зардаптарын жоюға атсалысқан 2500 ардагер ғана қалған. Соның 300-ге жуығы Шымкентте тұрады.
Бүгін Шымқалада аталмыш апатқа 37 жыл толуына орай, «Чернобыль ардагерлері Одағының» ұйымдастыруымен апат құрбандарын еске алу және ардагерлердің ерлігіне тағзым кеші өтті. Чернобыль құрбандары аллеясында өткен іс-шараға Чернобыль апатының, Ауған, Тәжік-Ауған, Таулы Қарабақ, «Семей сынақ», «Желтоқсан ақиқаты» қоғамдық ұйымдарының ардагерлері қатысты.
Жиналған көпшілік апат салдарынан қаза болған сарбаздардың құрметіне ескерткішке гүл шоқтарын қойып, бір минут үнсіздікпен еске алды. Жиында сөз алған Шымкент қалалық ішкі саясат және жастар істері жөніндегі басқарма басшысының орынбасары Бексұлтан Әділханов бұл күннің маңыздылығына тоқталып, белсенді ардагерлерді марапаттады.
Айта кетейік, ардагерлердің басын біріктіретін « Чернобыль ардагерлер Одағы» қоғамдық бірлестігі қаламыздағы азаматтық қоғамды дамыту, жастарды патриотизмге тәрбиелеу бағытында белсенді жұмыс атқарып келеді. Олар жастарменкездесіп, өздерінің ерлік оиғаларымен бөлісіп жүр.
Жастардың сұрақтарына жауап беріп, жас ұрпақ тәрбиесіне етене араласып жүр. Олардың мақсаты жас ұрпаққа ерлікті дәріптеу, үлгі тұтуға шақыру. Ал ерлік ешқашан ұмытылмайды. Өз бастарын қатерге тіккен азаматтардың өнегесі ел жадында мәңгі сақталады.
