Сайрам ауданы, Қарасу ауылдық округі, Ақбай ауылынан жер сатып алған тұрғындар бүгінде сан соғып отыр. Айтуларынша әкімдік меншіктегі жерлерін заңсыз деп тауып, мемлекет иелігіне қайтарып алмақ. Ашуға булығып, биліктегілердің былығын беттеріне басқан жұрт, құжаттарын түгел көрсетіп дәлелдегенімен, оның күші көк тиын екенін еш түсіне алмай отыр.
Тұрғындардың айтуынша, 2015-2016 жылдары Нұрлан Мұсаевтан ақшасын беріп, жер учаскелерін сатып алған. Халықтың қолында жер телімін беру туралы әкімнің қаулысы, жердің актісі сынды құжаттардың барлығы бар. Тіпті жер телімдері Егов электронды порталына тіркеліп, осы кезге дейін жер салығын төлеп келген. Алайда бұл құжаттардың барлығы заңсыз болып шыққан.
Әкімдіктен келген басшылардың, шағымын айтқан халыққа берер жауаптары да дайын болды. Кезінде тұрғындарға осы жерді сатып кеткен адамдарды сотқа беріп, төлеген теңгелерін өндіріп алсын деді. Сайрам ауданы әкімінің орынбасары Шухтар Убайдулаевтың айтуынша, халық қанша шулағанымен, заңсыз жер мемлекетке қайтарылады. Ал соғылған үйлер сүрілуі мүмкін.
Тұрғындар бұл — биліктің былығы мен жауапты мекемелердің салғырттығының кесірі дейді. Әділдік іздеген жұрт сот жүйсіне де сенуден қалған. Жер дауы облыс деңгейінде шешілмесе, тұрғындар ел Президентіне шығамдануға дайын отыр.
