Төлеби аудандық білім бөлімі әдістемелік кабинетінің жоспарына сәйкес, «Тіл – достықтың кілті, ынтымақтастықтың бастауы» тақырыбында оқушылар дебатының аудандық кезеңі өтті.
Дебаттың аудандық кезеңіне аймақтық кезеңдерде жеңімпаз атанған 12 команда қатысты. Нәтижесінде қазақтілді командалар арасынан Қ.Байболов атындағы жалпы орта мектептің оқушылары, ал орыстілді командалар арасынан Бірінші Мамыр жалпы орта мектебінің білім алушылары жеңіске жетіп, дебаттың облыстық кезеңіне жолдама алды.
— Дебаттар логикалық, сыни тұрғыда ойлауды, сөйлеу дағдысын дамытып, коммуникативті мәдениетке тәрбиелейді және өздігінен шешім қабылдауға дайындайды, тұлғаның қоғамның болашақ көшбасшысы ретінде қалыптасуына ықпал етеді. Осы айтылғандар Төлеби ауданының мектептерінде басшылыққа алынып, бұл білім мекемелерінің барлығында дерлік дебат клубтары жұмыс жүргізуде. Дебат клубтары оқушы жастардың бойында белсенді азаматтық ұстанымдарды қалыптастыруды, білім алушыларға шешендік өнерді меңгертуді, оларға дипломатиялық дауларды шешуді үйретуді мақсат етуде, — дейді Төлеби аудандық білім бөлімінің әдіскері Салтанат Жұманова.
Бүгінгі таңда қазақстандық мектептерде дебат қозғалысы белсенді дамып келе жатқанын айта кетейік. Жалпы республика бойынша дебат клубтарының саны 6 мыңнан асады. Оларға 100 мыңнан астам оқушы барады.
Қазақстанда жыл сайын 20 мыңнан астам дебат турнирі өткізіледі, оған ондаған мың студент пен оқушы қатысады. Елімізде оқушыларды пікірсайыс өнеріне баулитын 100-ден астам адамнан құралған тәжірибелі ұлттық пікірсайысшылар пулы қалыптасты. Сонымен қатар колледждер мен мектептерде дебат клубтарына көмектесу үшін студенттік десанттар құрылып жатыр.
