Түркістан облысы Адами әлеуетті дамыту басқармасына қарасты Білім беруді дамыту орталығының «Мектепке дейінгі және бастауыш білім беру» кафедрасының ұйымдастыруымен «Педагогтің кәсіби құзыреттілігі-оқыту сапасын арттыру кепілі» тақырыбындаонкүндік іс-шарасы өтті.
Шара шеңберінде «Шеберлер қаласы: ата – бабамыздың мұрасын сақтаймыз және дамытамыз» атты өлкетану сәндік қолданбалы шығармашылық көрмесі салтанатты түрде ашылды. Көрмеге Түркістан, Сауран, Кентау адами әлеуетті дамыту бөлімдерімен қоса, өзге аудан-қалалар да қатысып, белсенділік танытты.
Онкүндік — педагогтің кәсіби дамуға бағытталған жұмыстарын жандандыру, іс-әрекеттерді жаңаша ұйымдастыру қабілеттерін арттыру мақсатында ұйымдастырылды. Аталған іс-шара аясында педагогтердің тәжірибе алмасуына, озық тәжірибені бөлісуіне, жас мамандардың кәсіби біліктілігінің көтеруіне бағытталған.
Сонымен қатар, онкүндік аясында Түркістан қаласының «Ертөстік», «Балапан», «Толағай» бөбекжай-балабақшалары мен №31 Бастауыш мектеп балабақша кешені базасында облыстық тәжірибелік семинар өтті.
Тәжірибелік семинар «Мектепке дейінгі тәрбиелеу мен оқытудың жаңашылдықтарын меңгертуде педагогтердің шеберлік алаңы», «Мектепке дейінгі ұйымда ұлттық құндылықтарды насихаттаудың маңыздылығы», «Мектеп жасына дейінгі балалардың қызығушылығын арттыруда эксперименттік жұмыстармен айналысудың тиімділігі», «Мектепке дейінгі ұйымдарда ата-аналар мектебін қалыптастырудың тиімді жолдары» тақырыптарында жаңа форматта ұйымдастырылды.
Нәтижесінде, педагогтердің педагогикалық қызметте өзін-өзі жетілдіруіне, талдау жасауына, шығармашылық қабілеттері мен кәсіби ұстанымдары, педагогтердің оқу-тәрбие процесіне инновациялар енгізуде және ізденуде мотивациялары арта түспек.
