Биыл Қаратау ауданына қарасты орталық көшелердің бойына және көпқабатты үй аулаларына 5000 түп ағаш көшеті отырғызылды. Бұл туралы Қаратау ауданы әкімі РахымбердіМүлкеманов БАҚ өкілдерімен өткен кезекті брифингте атап өтті.
Брифинг барысында Қаратау ауданы аумағында алғашқы тоқсанда атқарылған жұмыстар қатарын баяндап, алдағы уақытта жоспарға қойылған негізгі жобалар жайында баяндады.
– Қаратау ауданының аумағы — 19 500 гектар, 190 мыңнан астам тұрғыны бар. Аудан аумағында 18 елді мекен, жалпы көшелер саны – 595, демалыс орындарының саны – 7. Биыл Сайрам және Қызылсу елді мекендерін сапалы ауыз сумен қамту жұмыстары атқарылуда. Құрылыс жұмыстарының аяқталған соң, аудан аумағындағы барлық елді мекендер толық сапалы ауыз сумен қамтылады.Елді мекендерді табиғи газбен қамту көрсеткіші 90 пайызды құрайды. 2025 жылға дейін табиғи газбен қамту көрсеткішін 100 пайызға жеткізу жоспарланған. Сондай-ақ, жыл соңына дейін жалпы ұзындығы 50 шақырымды құрайтын 74 көше асфальтталады, – деді аудан әкімі Рахымберді Мүлкеманов.
Сондай-ақ, аудан әкімі ирригациялық арықтар, көшелерді абаттандыру, ономастикалық мәселелер жөнінде де атқарылған жұмыстарға тоқталды.
Қосымша ақпар, Қаратау ауданында жыл соңына дейін аудан аумағындағы 240 орынға бейнебақылау камералары орнатылады деп жоспарланған. Одан бөлек, Қаратау ауданы аумағындағы орталық 91 көше жарықтандырылған. 2022 жылы 30 көше мемлекеттік-жекешелік әріптестік аясында жарықтандырылды. Ал, 2023 жылы аудан аумағындағы маңызға ие 21 көшені жарықтандыру жұмыстары атқарылып жатыр. Сонымен қатар, 2025 жылға дейін аудан аумағындағы 150-ге жуық көшені жарықтандыру жоспарланған. Брифинг барысында аудан басшысығ инфрақұрылым бағытындағы мәселені шешу бойынша атқарылып жатқан жұмыстарды толық баяндады.
