Шымкенттік дарынды оқушылар республикалық пән олимпиадасынан 22 медаль жеңіп алды. Оның 17-сі «Білім-инновация» лицейінің оқушыларына тиесілі. Осылайша мектеп білім шыңын бағындыруда өз рекордын жаңғыртыпты. Қазір жоғары нәтиже көрсеткен лицей шәкірттері ұлттық құрамаға ілікті. Енді олар ел намысын шетелдерде қорғайтын болады.
Жаратылыстану-математикалық бағытындағы республикалық пән олимпиадасынан шымкенттік оқушылар 22 медаль еншіледі. Оның 17-сі ұл балаларға арналған білім инновация лицейінің шәкірттеріне тиесілі. 9 сынып оқушысы Досымжан Назарбай білім сайысында физика бағыты бойынша ең жоғарғы балл жинап, абсалютті 2 орыннан көрінді. Нәтижесінде пән олимпиадасының алтын медаліне ие болды.
«Бірінші турда теория, екінші турда эксперимент жасадық. Бірақ 2-тур виртуалды өтті. Ол жерде есептер термодинамика тақырыбынан келді. Тапсырмада тұзды су мен тұщы судың еру кезіндегі айырмасын табу керек болды»,- деді Республикалық пән олимпиаданың алтын медаль иегері Назарбай.
Мектептен физика пәні бойынша 4 оқушы қатысқан. Пән мұғалімдерінің айтуынша соның ішінде кішкентай болса да, Досымжан өзіне талапты жоғары қойып, тынымсыз дайындығының арқасында жеңіске жеткен.
«Республикалық кезеңге 4 оқушы қатысты. Оның 2-еуі орын алды. Досымжан Назарбай деген оқушым, 50 шақты оқушының ішінен абсолют екінші болып, алтын медаль иеленді. Жеңіске жеткені еңбектің арқасында. Қажырлы еңбегі. Дисциплинасы өте жақсы»,- деді физика пәнінің мұғалімі Азат Нұрмұхамет.
Еске салсақ, 2021 жылы Олимпиада қорытындысы бойынша Шымкент қаласының шәкірттері үздік нәтиже көрсеткен болатын. Яғни, 2 алтын, 11 күміс, 18 қола медаль жеңіп алған еді. Сондай-ақ, қаламыздың 6 мектебі еліміздегі ең үздік 100 мектептің қатарына енген болатын.
