Наурыз айында Шымкент қаласындағы 109 орталығына 27 347 арыз-шағым түсті. Бұл туралы Шымкент қаласы әкімдігінің баспасөз қызметі мәлімдеді. Аталған шағымдардың ішінде 93,5%-ы орындалды. Қалған талап-тілектер жауапты мекемелердің қарауында. Бұдан бөлек 19473 мәселе 1 қоңырау шалудан шешілді. Арыздар көбінесе 109 нөмірі арқылы қабылдануда. Байланыс тетігі арқылы өткен айда 23 178 шағым тіркелді. Қалған арыз-шағымдардар әлеуметтік желілер арқылы жолданған.
Еске салсақ, Мемлекет басшысының «Халық үніне құлақ асатын мемлекет» тұжырымдамасына сәйкес, халықпен кері байланыс орнатуды күшейту үшін Шымкент қаласы әкімінің бастамасымен 2020 жылы «Айкөмек-109» атауымен орталық ашылған болатын. Бүгінде орталық қала тұрғындарын жергілікті билік өкілдерімен байланыс орнатуда тиімді жұмыс нәтижесін көрсетіп отыр. Орталық тәулігіне 24 сағат демалыссыз қызмет етіп, азаматтардың өтініші бойынша әлеуметтік мәселелерді шұғыл шешумен айналысады. Мұндағы мамандар шағым келген бойда тиісті мекемемен байланысады. Ең бастысы, арызданған тұрғынмен кері байланыс орнатылып, жұмыс барысы баяндалып отырады.Қаладағы басқармалар арыз-шағым түсу саны бойынша 3 топқа бөлінген. I топқа ең көп мәселе түсетін басқарма – жолаушылар көлігі және автомобиль жолдары басқармасы кіреді. ІІ топқа талап-арыз орта деңгейде түсетін басқармалар жатады. Олар – ауыл шаруашылығы және ветеринария, энергетика және инфрақұрылымды дамыту басқармасы және денсаулық сақтау басқармасы. Бұл басқармаларға ай сайын 150-400 аралығында арыз-шағым түседі. ІІІ топқа қалған 18 басқарма жатады: тұрғын үй, құрылыс, жұмыспен қамту және әлеуметтік қорғау, цифрландыру, білім, сәулет, қала құрылысы және жер қатынастары, қалалық орта сапасы және бақылау, мемлекеттік еңбек инспекциясы, мәдениет, тілдерді дамыту және архивтер басқармасы мен дене шынықтыру және спорт басқармалары 1 ай көлемінде түскен тұрғындардың сұрақтарына толықтай жауап беріп, орындады.
Қала әкімі Мұрат Әйтеновтің тапсырмасына сәйкес 2020 жылдың 26 маусымында ашылған Шымкент қаласының ситуациялық 109 орталығы тәулік бойы істейді. Орталықтың 36 қызметкері 6 ауысым бойынша 24/7 режимінде қызмет етеді.
Алғашында мекеме қызметкерлері қала тұрғындарына 30 қызмет түрін көрсетіп, 2021 жылы қызмет түрлері 93-ке дейін артты. Ал қазіргі таңда орталық көрсететін қызмет түрлері 120-ға дейін жетіп отыр. Оның ішінде қала тұрғындары автобус паркіне жұмысқа орналасуға өтінім білдіру, еңбек қатынастары бойынша туындаған мәселелер, интернетке қосылуға өтінім беру қызметтері бойынша да хабарласа алады.
