Шымкент қаласының туризм және сыртқы байланыстар және креативті индустрия басқармасы бүгінде 4 бағыт бойынша жұмыс істейді. Оның біріншісі – туризмді дамыту. Екінші – маркетингті ілгерілету, үшінші бағыт – сыртқы байланыстар және ең соңғысы – креативті индустрия.
Шымкент 8 елдің 10 қаласымен бауырластық қарым-қатынас орнатқан. Олар: Худжанд, Могилев, Байинь, Стивенэйдж, Измир, Паттайя, Ахарнон, Гросетто, Эскишехир және Адана қалалары. Бұл қалалармен бауырластық Шымкенттің іскерлік әлеуетінің артуына да зор септігін тигізіп отыр. Қазіргі таңда Қытай елінің Сиань қаласымен ынтымақтастықты нығайтып, бауырластық қарым-қатынас орнату жөнінде келіссөздер жүргізіліп жатыр.
Сиань қаласы – Шэньси провинциясының астанасы. Ол географиялық жағынан Қытайдың орталығында орналасқан. 2020 жылғы санақ бойынша халқының саны 12,95 миллион адам болған. Қаланың жалпы ішкі өнімі жыл сайын 5,2% өсіммен 150 миллиард доллардан асқан. Осындай экономикасы дамыған қалалармен бауырластық қатынас орнату өз кезегінде экономиканың түрлі салаларында тәжірибе алмасуға мүмкіндік береді.
Шымқаланың туристік әлеуетін насихаттап, шаһар экономикасына көбірек инвестиция тарту үшін биыл бірнеше елдерде роуд-шоу ұйымдастыру жоспарланып отыр. Жуырда еліміздегі Татарстан Республикасының өкілетті өкілімен, Ресей Федерациясының Алматы қаласындағы Бас консулы және Түркия елінің инвесторларымен кездесу ұйымдастырылды.
Климаты мен географиялық орналасуы қолайлы болып табылатын үшінші мегаполисте биыл 12 жаңа туристік нысан ашылады. «Бұл әлеуеті жоғары Шымкент қаласының аймақтағы ірі туристік орталықтардың бірі ретінде қалыптасуына септігін тигізіп, кең мүмкіндіктерге жол ашады» дейді сала мамандары.
Туризм саласындағы бұл инвестициялық жобалар — «Diamond Hotel», «Barsa», «Таукехан Plaza», «Cosmopolitan Hotel», «7Jol» сияқты жайлы қонақ үйлер мен демалыс кешендері бой көтеріп, іске қосылады. Жобаларды жүзеге асыру құны 9 млрд теңгені құрайды. 400-ден астам жаңа жұмыс орны ашылады.
Естеріңізге сала кетейік, 2022 жылы Шымкентке 500 мыңға жуық турист келген. Оның ішінде 36 мыңы шетелдік турист. Ал, 2021 жылдың бірінші жартыжылдығында 158 224 турист келген.
Қаламызда 147 орналастыру орны бар. Яғни Шымкент бір күнде 6 мыңға жуық туристі қабылдай алады. Сонымен қатар 5 ішкі рейс және 7 халықаралық рейс қонаққа қызмет көрсетеді. Бүгінде сала мамандары Шымкенттің гастрономиялық туризміне ерекше көңіл бөліп отыр.
