Бүгін облыстық Жастар ресурстық орталығында Түркістан облысы әкімінің орынбасары Бейсенбай Тәжібаевтың қатысуымен мемлекеттік жастар саясатын жүзеге асыру мақсатында 2023 жылға арналған жылдық жұмыс жоспарын талқылау бойынша кездесу өтті.
Басқосуда Түркістан облысы қоғамдық даму басқармасының «Жастар ресурстық орталығы» КММ-нің басшысы Ерасыл Төлебаев модераторлық етіп, жұмыс жоспарын баяндады.
Жиынға 17 аудан, қала бойынша Жастар ресурстық орталығының басшылары мен белсенді жастар қатысты. Кездесу барысында «Жастар ресурстық орталығы» КММ-і басшысының орынбасары Ернар Бектаев мемлекеттік жастар саясатындағы өзекті мәселелер және 2023 жылы жастарға арналған жобалармен таныстырды.
Еркін форматта өткен кездесуде әкім орынбасары белсенді жастардың ойын тыңдап, ұсыныстарын талқылады. Сонымен қатар, жастар жұмыспен қамту, қолжетімді баспана мәселесі мен білімді жетілдіру, жас кәсіпкерлерді қолдау мен қоршаған ортаны қорғауға байланысты ұсыныстар айтты. Бұл орайда, мемлекеттік жастар саясатындағы өзекті мәселелер назарға алынып, оның біршама шешілу жолдары айтылды.
Айта кетсек, биыл 19 наурыз күні Парламент сайлауын өткізу Мемлекет басшысы өткен жылдың қыркүйек айында жариялаған саяси жүйені қайта бастау үдерісінің жалғасы болып отыр. Бірінші кезең ретінде Қ.Тоқаевтың реформалық бағыты төңірегінде топтастырылғанын паш еткен президенттік сайлау болды. Мемлекеттік институттарды қайта іске қосудың келесі қадамы Қазақстан Республикасы Парламенті Мәжілісі мен барлық деңгейдегі мәслихаттар депутаттарының кезектен тыс сайлауы. Соңғы кезеңі жаңа министрлер кабинетін жасақтау болады. Парламент және мәслихаттар сайлауына 7 партия қатысуға ниетті. Келе жатқан сайлауда әйелдердің, жастардың және мүмкіндігі шектеулі жандардың кемінде 30 пайызы ұсынылуы керек. Яғни жастарды қолдауға басымдық берілуде.
