Өткен жылдың қорытындысымен Түлкібас ауданына 11 339 турист келген. Оның ішінде 450 шет ел азаматтары. Бұл туралы бүгінгі аудан әкімі Нұрлан Байғұттың төрағалығымен өткен кезекті лездемелік жиында аудандық кәсіпкерлік бөлімінің басшысы Ұ.Әлімбаев мәлімдеді. Сонымен қатар, бөлім басшысы өткен жылдың қорытындысымен кәсіпкерлік саласында оның ішінде индустрияландыру мен инвестиция тарту бағытындағы атқарылған жұмыстарды баяндап, алдағы іске асатын жобалармен таныстырды.
Бұдан бөлек жиынның күн тәртібінде ауданның әлеуметтік-экономикалық даму көрсеткіштері және дипломмен ауылға мемлекеттік бағдарламасының іске асу барысы мен сыбайлас жемқорлыққа қарсы күрес жұмыстарының барысы қаралды.
Жалпы өткен жылы дипломмен ауылға бағдарламасы бойынша жәрдемақы алуға 80 жас маманнан өтініш түскен. Соның ішіндегі 62 маманға 100 АЕК көлемінде әлеуметтік қолдау шаралары көрсетілген. Және 2022 жылы 10 жас маманға үй салуға немесе сатып алуға 1500 АЕК көлемінде пайызсыз несие берілген.
Сондай-ақ, жиын барысында жаңадан мемлекеттік қызметке қабылданған Састөбе кентінің әкімі Асқар Айдарбековтың Ант қабылдау рәсімі өтті. Жауапты қызметке қадам басқан Асқар Талғатбекұлына аудан басшысы сәттілік тілеп, құттықтауын жеткізді.
Жауапты баяндамашылардан соң жиынды қорытындылаған Нұрлан Мархабатұлы, сыбайлас жомқорлықпен күресу, оның алдын алу жұмыстарын барынша күшейту бойынша бөлім басшылары мен ауыл әкімдеріне бірнеше тапсырма жүктеді. Атап айтсақ, сыбайлас жемқорлыққа қарсы іс-қимыл агенттігінің сенім телефондары көрсетілген тақтайшаларды жаңартуды, барлық басшылар қызметкерлеріне сыбайлас жемқорлықты алдын алу бойынша түсіндіру жұмыстарын жүргізуді тапсырды.
Жауапты орынбасры мен тиісті бөлім басшысына коммуналдық қызметтердің үздіксіз жұмыс істеп тұруын бақылауда ұстауды ескертіп, тәулігіне 24 сағат кезекші жөндеу бригадалары сақадай сай дайын тұру керектігін атап өтті.
Ауданымыздағы мал жайылымы мәселесінің өзекті екеніне тоқталып, ауыл әкімдеріне осы бастан ортақ жайылымға көрші аудандардан мал кіргізбеу мәселесін бақылауда ұстауды және әр округте мал санағын нақты жүргізуді тапсырды.
