Төлеби ауданының 90 жылдық мерейтойына орай, аймақтағы кәсіпкерлік саласының дамуына үлес қосып жүрген бизнестегі азаматтар марапатталды. Салтанатты жиынға аудан әкімінің орынбасары Бақберген Құралбаев қатысып, бизнес өкілдерін Жаңа жыл мерекесімен құттықтап, ауданның әлеуметтік – экономикалық дамуына қосқан үлестері үшін алғысын жеткізіп, ауданның 90 жылдық мерейтойына арналған төсбелгісін, аудан әкімінің «Алғыс хатын» табыс етті.
— Атақты неміс экономисі, Гарвард университетінің профессоры Иозиф Шумпетердің «Кәсіпкер болу – басқаның істегенін істемеу» деген сөзі бар. Өз еңбегін ұйымдастыра білген адам кәсібін дөңгелете алады. Сіздер, кәсіптеріңізді дамыта отырып, ауданымыздың кірісін молайтып, тұрғындарға жұмыс орнын ұсынып отырсыздар. Ел игілігі жолындағы еңбектеріңіз табысты болсын! Сіздерді Жаңа жыл мерекесімен құттықтай отырып, алдағы жылдары да осындай ел игілігі үшін жасалып жатқан игі істер жалғасын тауып, өздеріңізбен бірге орындалатынына біздің сеніміміз мол, деді құттықтау сөзінде Бақберген Тәңірбергенұлы.
Бүгінде аудан аумағындағы кәсіпкерлік саласында жұмыс істеп тұрған субъектілер саны – 8428-ді құрайды. Кіші және орта бизнесті дамыту үшін жыл басынан 6100 жеке азаматтарға 3 млрд 921 млн теңгенің несиесі берілді. «Бизнестің жол картасы-2025» бизнесті қолдау мен дамытудың мемлекеттік бағдарламасы шеңберінде жаңа бизнес-идеяларды іске асыруға мемлекеттік гранттар беру бойынша ауданнан 38 жоба қатысып, оның ішінен іріктеуден жалпы 10,0 млн теңгеге 2 жоба өтті. Жобалар жылдың соңына дейін «Даму» қоры арқылы қаржыландырылады.
Аудан аумағындағы кәсіпкерлік саласын дамыту бағытында бірқатар жұмыстар атқарылуда. Президент Қасым-Жомарт Тоқаевтың Жолдауында шағын және орта бизнеске қолдау көрсету мәселесіне ерекше назар аударды. Сондай-ақ, экономикамыздың басты тетігі болып табылатын кәсіпкерлік саласын дамыту үшін кәсіпкерлерге жеңілдетілген несие беру, әкімшілік кедергілерді жою және тиісті инфрақұрылыммен қамтамасыз етуді тапсырды. Қазіргі кезде, ауданда аталған мәселелер бойынша тиісті жұмыстар жүргізіліп жатыр.
