Шымкентте «Жас сарбаз» сыныбының оқушылары ант қабылдады

Шымкенттегі Терешкова атындағы №31 жалпы орта білім беретін мектебінде «Жас сарбаз» сыныбы ашылды. «Жас сарбаз» сыныбына қабылданған 20-ға тарта оқушы салтанатты түрде ант қабылдады. Жас сарбаз сыныбының мақсаты – оқушылар арасында әскери-патриоттық тәрбиені нығайту, олардың бойында Отанға деген сүйіспеншілікті арттыру.
Салтанатты шараға қалалық білім басқармасының өкілдері, Қарулы Күштер, Семей сынақ, Тәжік-Ауған қоғамдық бірлестігінің ардагерлері қатысты. Жас сарбаздарды қолдауға 6506 әскери бөлімінің үрмелі аспаптар оркестрі арнайы келіп, музыкалық сүйемелдеді. Шара барысында оқушылар автоматты бөлшектеу және жинау жаттығуларын орындады. Әскери қорғаныш киімдерін жылдам кию шеберліктерін паш етті.
Шара соңы оқушылар дайындаған концерттік бағдарламаға ұласты. Жиналғандар «Жас сарбаз» сыныбының оқушыларына сәттілік тілеп, еліміздің қорғаны болуға сенім білдірді