Сауран ауданында «Жастар ресурстық орталығы» КММ-нің ұйымдастыруымен «INTELLECT BATTLE» интеллектуалды сайысы өтті.
Ойынның негізгі мақсаты – жастардың танымдық қабілетін арттырып, интеллектуалды ойынға қызығушылықтарын ояту арқылы білім деңгейін көтеру. Бастысы, интеллекттуалды ортаны қалыптастыруға бағытталған.
Ойын Сауран жастары мен мекеме қызметкерлері арасында ұйымдастырылды. Жоба авторы — Г.Серікқызы. Ашылу салтанатында Сауран ауданының әкімі Ғ.Рысбеков сайысқа қатысушыларға сәттілік тіледі.
Зияткерлік сайысқа аудандық мәслихат хатшысы М.Күнпейісов, аудан әкімінің орынбасары С.Садибаев, аудандық аналар алқасының төрайымы Н.Жұманова, аудандық «Жастар ресурстық орталығының» басшысы А.Дүйсенбекова қазылық жасап, қатысушыларға әділ бағаларын берді.
Тартысты өткен сайысқа жалпы 20 команда қатысып, жүзден жүйрік шыққан үш команда арнайы дипломмен марапатталды. Оларға қаржылай сыйақы мен кубоктар табысталды. Атап айтқанда, өзгелерден оқ бойы оза шапқан «101» командасы І орыннан көрінсе, жүлделі ІІ, ІІІ орындарды «Оқжетпес» пен «Яссы» командалары өзара бөлісті. Бұдан бөлек, жүйріктігімен көзге түскен «Үздік ойыншы» номинациясына ие болған қатысушыларға арнайы алғыс хаттар мен сыйлықтар табыс етілді.
